ფუტსალის უმთავრესი ლიგის მე-14 ტურის ოთხი მატჩიდან, ფრედ მხოლოდ ერთ შეხვედრა დასრულდა. ტურის ცენტრალური მატჩი, კსუ-სა და არმიას დაპირისპირება, უკვე ზედიზედ მეორედ ფრედ დასრულდა. ზედიზედ ორი ზავით, კავკასიელებმა ქულები დაკარგეს და ზემოთ აღზევების შანსები შეუმცირდათ... თუმცა, სჯობს ტურის მიმოხილვისას თანმიმდევრობას მივყვეთ.

ეს ტური ევროპის უნივერსიტეტისა და თსუ-ს დაპირისპირებით დაიწყო. წინა მატჩის მსგავსად, ეს სტუდენტური დერბიც თსუ-ს სრული უპირატესობით წარიმართა. თსუ-ს კაპიტანმა გიორგი ჩიმაკაძემ, მე-3 წუთზე გახსნა ანგარიში. ექვს წუთში ბორის ესებუას დარტყმისას, ბურთი გოგოლაძეს მოხვდა და რიკოშეტით კარში აღმოჩნდა, 0:2. შესვენების შემდეგ თსუელებმა გოლების ფოიერვერკი მოაწყვეს, კიდევ 7 ბურთი გაიტანეს, 0:9. რასაც ევროპელებმა მხოლოდ ერთი, გიორგი ქურხულის პრესტიჟის გოლით უპასუხეს, 1:9. თსუ-ს ამ გამარჯვებაში ლომის წილი, კაპიტანმა გიორგი ჩიმაკაძემ დაიდო, რომელმაც 5 ბურთი გაიტანა და ბომბარდირთა დავას, 17 გოლით სათავეში ჩაუდგა. ნოდარ ქურცაძემ დუბლი მიითვალა, ჯანიკო გიორგაია კი ერთი გოლის ავტორად მოგვევლინა.

ნიუ ვიჟენ ჯორჯიანსმა ქუთაისს წინა შეხვედრაშიც დამაჯერებლად სძლია და ამჯერადაც იგივე გაიმეორა. ჯორჯიანსელებმა მე-5 წუთზე გახსნეს ანგარიში, შოთა თოფურიას გრძელი ზუსტი პასით, ვახტანგ ჯვარაშვილმა ბურთი შეუჩერებლივ გადაგზავნა კარში, 1:0. ამან ქუთათურები გამოაცოცხლა, მაგრამ ავთანდილ ასათიანის ბიჭებმა თამაშის სადავეები არ დათმეს. მასპინძლებს ფორის გაზრდაც არაერთხელ შეეძლოთ, მაგრამ ეს მხოლოდ ტაიმის მიწურულს შეძლეს. მე-20 წუთზე ვახტანგ კეკელიამ თოდუას გამჭოლი გადაცემა გოლად აქცია, 2:0. ქუთათურებმა მეორე ტაიმში  პრესინგ მიმართეს, მაგრამ მაინც თბილისელები დომინირებდნენ. 27-ე წუთზე კახაბერ მაისაიას მიერ წამოწყებული იერიში ნიკოლოზ გაბრიჩიძემ გოლით დააგვირგვინა, 3:0. იმერლებმა იერიშები გაამწვავეს, მაგრამ ამას მხოლოდ ერთი გოლით უპასუხეს. 37-ე წუთზე გიორგი ბედენაშვილმა გაიტანა, 3:1. ჯორჯიანსელებმა მე-11 მოგება მიითვალეს და ცხრილის სათავეში 4-ქულიანი ფორა შეინარჩუნეს.

მიმდინარე სეზონის მე-7 ტურში, პსპ-მ ილიაუნს, თითო ტაიმში თითო გოლი გაუტანა და მშრალად მოუგო. ამჯერად კი სტუდენტები ფარმაცევტებს გაუძალიანდნენ და პირველი ტაიმი უგოლოდ დასრულდა. შესვენების შემდეგ პსპ-მ იძალა. 28-ე წუთზე, ნიკოლოზ კურტანიძემ შორეული ძლიერი დარტყმით გახსნა ანგარიში, 1:0. ილიაუნმა ამას ორიოდე წუთში უპასუხა, ომარ ასაშვილმა ცხრიანში ეფექტური დარტყმით წონასწორობა აღადგინა, 1:1. ფარმაცევტები გაცხარდნენ და წუთნახევარში ნიკოლოზ კოპლატაძემ, სტუდენტთა გადაცემა ჩაჭრა და ბურთი კარში გადაგზავნა, 2:1. კიდევ ორ წუთში, მელტონ ახალაიას აუტიდან მოწოდებულ ბურთს, გიორგი ზუნტუროვმა მაკრატელათი ეფექტური დარტყმით კარის ბადეში მიუჩინა ადგილი (3:1). უნდა აღინიშნოს, რომ ზუნტუროვის გატანილ ბურთს, სეზონის საუკეთესო გოლის სტატუსზე სამართლიანი პრეტენზია ექნება. წუთში ახალაიამ მეტოქეს ბურთი აართვა და კარში გადაგზავნა, 4:1. სტუდენტებმა პრესინგ მიმართეს, მაგრამ მხოლოდ ბექა ონიანის ერთადერთ გოლს გამორჩნენ, 4:2. ამ შედეგით პსპ მეორე ადგილზე დარჩა, ილიაუნი კი კვლავ მეექვსეა და ლიგის დებიუტანტთა ტანდემს ორი ქულით უსწრებს.

მიმდინარე სეზონში არმიამ კსუ-სთან უხვგოლიანი ფრე (6:6), ბოლოსწინა წუთზე გატანილი ბურთით გაახერხა. ამჯერად კი არმიელები ორჯერ უგებდნენ კავკასიელებს. ლადო ბურდულის ბიჭებმა თავიდანვე გამოაჩინეს ბრჭყალები. მეორე წუთზე ოთარ ბერეჩიკიძის პასით ლაშა ფოფხაძის დარტყმული ბურთი, სტუდენტების კიპერმა თორნიკე ბუკიამ კი მოიგერია, მაგრამ დასწრებაზე არმიელთა კაპიტანმა გიგა ბერაიამ იმარჯვა და ანგარიში გახსნა, 0:1. სამ წუთში გიორგი ტიკურიშვილის ძლიერი დარტყმისას, ბერეჩიკიძის ფეხიდან ასხლეტილი ბურთი არმიელთა კარში აღმოჩნდა და ანგარიში გათანაბრდა, 1:1. თამაშმა უფრო დაძაბული ხასიათი მიიღო და გარდამავალი უპირატესობით გაგრძელდა. მე-17 წუთზე გიორგი ტიკურიშვილმა, ხარატიშვილის პასი გოლად აქცია და სტუდენტები დაწინაურდნენ, 1:2. ბოლო ორი წუთის გარდა, თითქმის მთელი მეორე ნახევარი უგოლოდ წარიმართა. არა და, ორივე გუნდს შეეძლო ანგარიშის შეცვლა. კავკასიელებმა ხისტ თამაშს უმატეს, რის გამოც მე-11 წუთზე გაფრთხილებების ლიმიტი ამოწურეს, რამაც არმიელთა წისქვილზე დაასხა წყალი. სწორედ გაფრთხილებათა სიმრავლის გამო, 38-ე წუთზე, არმიამ პენალტის დარტყმის უფლება მოიპოვა, რომელიც ამირან ცხომარიამ გოლად აქცია, 2:2. მატჩის დასრულებამდე ნახევარი წუთით ადრე, ლაშა ფოფხაძემ არმია წინ გაიყვანა, 2:3. კსუ-ს ბოლო შეტევა შედეგიანი გამოდგა, კუთხურიდან სიგუნავას ჩაწოდებული ბურთი ტიკურიშვილმა შეუჩერებლივ კარში გადაგზავნა (3:3) და დუბლით, კავკასიელები მარცხისგან იხსნა. ამ ზავის შედეგად0, კსუ მესამეზე დარჩა, მაგრამ მეორეადგილოსანი პსპ ერთის ნაცვლად, უკვე სამი ქულით უსწრებს.