ფუტსალის მთავარი ლიგის მე-15 ტურში ორი მოულოდნელი შედეგი დაფიქსირდა. არმიამ და ილიაუნმა თითო მოულოდნელობა შემოგვთავაზეს. სატურნირო ცხრილში განლაგება არ შეცვლილა, მაგრამ კსუ პსპ-ს ქულებით გაუთანაბრდა, არმია კი თსუ-ს. მოულოდნელ შედეგს აპირებდა ქუთაისიც, მაგრამ... მოკლე რეზიუმე აქ შევწყვიტოთ და მიმოხილვას თანმიმდევრობით მივყვეთ.

მოქმედი ჩემპიონებისთვის ევროპის უნივერსიტეტთან ჭიდილი, დიდი პრობლემა არ უნდა ყოფილიყო და ასეც მოხდა. ავთანდილ ასათიანის ბიჭებმა, თავიანთი ფავორიტობა მატჩის სტარტზევე აგრძნობინეს მეტოქეს. შოთა თოფურიამ მე-3 წუთზე გახსნა ანგარიში, წუთში ირაკლი თოდუამ სხვაობა გააორმაგა, 2:0. ორიოდე წუთში კი ჯორჯიანსელთა ბრაზილიელმა ახალწვეულმა კარლოს სანტოსმა, დებიუტი გოლით აღნიშნა და სხვაობა გაზარდა, 3:0. ტაიმის ბოლომდე ჩემპიონებმა კიდევ სამი გოლი გაიტანეს. გიორგი სილაგავამ დუბლი მიითვალა, ერთი ბურთი კი გიორგი ქურდაძის ანგარიშზეა. 24-ე წუთზე დავით ხეჩიკაშვილმა სხვაობა სოლიდური გახადა, 7:0. ამას სტუდენტებმა საბა გოგოლაძის ერთადერთი გოლით უპასუხეს. ნიუ ვიჟენ ჯორჯიანსმა 7:1 იმარჯვა და ამ სეზონში ზედიზედ მეექვსედ მოიგო.

მრისხანე პსპ-ს არმიელები არ შეუშინდნენ და მატჩის სტარტზევე შეეცადნენ ბურთზე კონტროლის მაგრამ მიხეილ თევზაძემ ინდივიდუალური ოსტატობის ხარჯზე, ანგარიში გახსნა, 1:0. ამან არმია გაახელა და მე-9 წუთზე ლაშა ფოფხაძის გოლით უპასუხა. ლადო ბურდულის ბიჭებს დაწინაურებაც შეეძლოთ, მათ ეს ვერ შეძლეს. მე-14 წუთზე ფარმაცევტები ისევ დაწინაურდნენ - მელტონ ახალაიამ არმიელთა იერიში ჩაჭრა, მეურვე და მეკარე ჩამოიშორა და 2:1. ფარმაცევტებმა გაფრთხილებების ლიმიტი ტაიმის ბოლომდე ამოწურეს და მე-18 წუთზე არმიელებმა ათმეტრიანის დარტყმის უფლება მოიპოვეს, მაგრამ ეს შანსი ქარს გაატანეს - ამირან ცხომარიამ ბურთი კარს ააცილა. მეორე ტაიმში არმიელებმა პირველზე უკეთ ითამაშეს და ეს ტაბლოზეც სათანადოდ აისახა, მაგრამ მხოლოდ მშრალი 8 წუთის შემდეგ. 29-ე წუთზე თამაზ გოგსაძემ გარღვევა განახორციელა სამი მეტოქე ჩამოიშორა და ცხომარია მოძებნა, რომელმაც ცხრიანში გატანილი ეფექტური გოლით, წონასწორობა აღადგინა, 2:2. არმია ამას არ დასჯერდა, მეტოქეზე ზეწოლა გააძლიერა და 33-ე წუთზე გიგა ბერაიამ არმიელები წინ გაიყვანა, 2:3. არმიამ თამაშის სადავეები ხელიდან არ გაუშვა და 37-ე წუთზე ლაშა ფოფხაძემ დუბლის შესრულებით ტაბლოზე საბოლოო ანგარიში, 2:4 დააფიქსირა. არმიამ პსპ-ს სძლია, შეაჩერა და კსუ-ს მასთან დაწევის შესაძლებლობა მისცა.

გასულ სეზონში თსუ-მ ილიაუნს სამივე მატჩი მოუგო, მაგრამ წელს ეს ბალანსი უკვე შეიცვალა. მიმდინარე სეზონის მერვე ტურში ილიაუნი თსუ-ს მინიმალურად უგებდა, მაგრამ მატჩი ფრედ, 1:1 დასრულდა. ამჯერად კი ილიაუნელებმა ნავსი გატეხეს. თამაში მშვიდად დაიწყო და ნელ-ნელა გახურდა. არაერთი შანსის მიუხედავად, ანგარიშის გახსნა დაგვიანდა. მე-15 წუთზე თორნიკე ქართველიშვილმა ძლიერი დარტყმით ილიაუნი დააწინაურა. თსუ-მ შეტევებს სიმწვავე და ორგანიზებულობა შემატა და შესვენებამდე ნახევარი წუთით ადრე, საბა მაჩიტიძემ ანგარიში გაათანაბრა, 1:1. მეორე ტაიმში ილიაუნმა გაცილებით უკეთ ითამაშა. 23-ე წუთზე კუხიანიძემ თსუ-ს შეტევა ჩაჭრა, ომარ ასაშვილს უპასა, რომელმაც ილიაუნი წინ გაიყვანა, 1:2. ამას მშრალი 15 წუთი მოჰყვა. მატჩის ბოლოს თსუ ვა-ბანკზე წავიდა და მეკარის თანხლებით შეუტია. ილიაუნმა საკუთარი კარის უსაფრთხოებაზე გააკეთა აქცენტი და თავის შანსს დაელოდა. შანსი კი არაერთი მიეცა. 38-ე წუთზე ლაშა კურტანიძემ კონტრშეტევა წამოიწყო და თავადვე გოლით დააგვირგვინა (1:3), რითაც მატჩის ბედი გადაწყვიტა. თსუ-მ იერიშები გააგრძელა, ილიაუნმა კვლავ კონტრიერიშზე იმარჯვა და ბოლო წუთზე, ბექა ონიანმა საბოლოო ანგარიში დააფიქსირა, 1:4.

როგორც ჩანს ქუთაისი კსუ-სთვის კერკეტი კაკალია. მიმდინარე სეზონის მერვე ტურში, კავკასიელებმა იმერლებს მხოლოდ მინიმალური სხვაობით, 4:3 მოუგეს. სტუდენტებს რიონისპირელებთან ამჯერადაც გაუჭირდათ. უფრო მეტიც, ბოლო 7 წუთამდე თამაშს აგებდნენ... არმიასთან გახერხებული ფრის შემდეგ კსუ-ს მოგება ჰაერივით სჭირდებოდა. მით უმეტეს, პსპ-ს ფრის გამო, კავკასიელებს შანსი მიეცათ, მოგების შემთხვევაში, ფარმაცევტებს ქულებით გათანაბრებოდნენ. კსუ-ს მოტივაცია არ აკლდა, მაგრამ ქუთათურები გაუძალიანდნენ. ლევან კობაიძის ბიჭებმა მხოლოდ მე-12 წუთზე გახსნეს ანგარიში - ნიკა ხარატიშვილმა მახვილი კუთხიდან გაიტანა, 1:0. ქუთაისმა მეტოქეზე ზეწოლა გააძლიერა და შესვენებამდე წამით ადრე, გვეტაძის გამჭოლი პასი ბაკურ გულუამ გოლად აქცია, 1:1. იმერლები მრისხანე კსუ-ს არ შეეპუენ და მეორე ტაიმში მეტოქეს მწვავე თამაში შესთავაზეს. 29-ე წუთზე იმერლები კურიოზული გოლით დაწინაურდნენ. ფარცვანიას მიერ აუტიდან მოწოდებული ბურთი დიაკვნიშვილმა ფეხით ვერ შეიმაგრა და კარში აღმოჩნდა, 1:2. კავკასიელებმა მეკარიანად შეუტიეს, მაგრამ იმერლები გოლისგან კიპერმა დსა ძელმა იხსნა. 31-ე წუთზე ქუთაისმა თბილისელთა იერიში ჩაჭრა და გულუამ თავისი საჯარიმოდან გატანით, იმერლებს ფორა შეუქმნა, 1:3. ამას, კსუ-ს მიერ მაღალ დონეზე ნათამაშები 7-წუთიანი წარმატებული აკორდი მოჰყვა. 33-ე წუთზე ტყეშელაშვილმა სიგუნავას პასი, გოლით დაფასა, 2:3. ნახევარ წუთში ტიკურიშვილის გადაცემით, უკვე სიგუნავამ გაიტანა და ანგარიში გაათანაბრა, 3:3. მატჩის დასრულებამდე ნახევარი წუთით ადრე, ტყეშელაშვილის გამჭოლი გადაცემა ტიკურიშვილმა გოლად აქცია და კსუ-მ ქუთაისი ისევ 4:3 დაამარცხა.