ვის დარჩება თასი, სპორტუნის თუ არმიას?


ეს უკვე გადაწყვეტილი ამბავია, ილიაუნისა და ნიუ ვიჟენ ჯორჯიანსის შემდეგ, ფუტსალში საქართველოს თასს, ახალი მფლობელი ეყოლება. ფინალში პირველად გასული მეტოქეები, სპორტუნი და არმია დაპირისპირდებიან ერთმანეთს. სენსაციების ავტორმა სპორტუნიმ, წალენჯიხისა და შარშანდელი ფინალისტი კსუ-ს შემდეგ, თასის მფლობელი ნიუ ვიჟენ ჯორჯიანსიც გამოთიშა გათამაშებიდან. არმიელებმა კი ქუთაისის შემდეგ, პსპ-ს სძლიეს. ეს მოკლედ, იმჯობესია დრამატული ნახევარფინალების მიმოხილვას თანმიმდევრობით მივყვეთ.

1/4-ფინალში კსუ-ს მძლეველ სპორტუნისთან, თასის მოქმედი გამარჯვებული ნიუ ვიჟენ ჯორჯიანსი ფავორიტად იყო მიჩნეული. ჯორჯიანსელებმა ფავორიტობა, მატჩის სტარტზე თამაშით დაამტკიცეს. მე-5 წუთზე ვახტანგ ჯვარაშვილის დარტყმისას ბურთი ორივე ძელმა აისხლიტა. ანგარიშის გახსნა,ჯვარაშვილის თანაგუნდელებსაც შეეძლოთ, მაგრამ მე-11 წუთზე ეს პატივი დავით ხეჩიკაშვილს ერგო, რომელმაც ეფექტური ცხრიანით ჯორჯიანსელები დააწინაურა, 0:1. სამ წუთში ირაკლი თოდუამ სხვაობა გააორმაგა. წუთში კი შოთა თოფურიამ ანგარიში კიდევ უფრო გაზარდა, 0:3. სტუდენტებმა, რომელთაც სათადარიგოთა სკამზე მოედნის მხოლოდ ერთი მოთამაშე ჰყავდათ, ამას წუთში უპასუხეს. კაპიტანმა გიორგი ექსეულიძემ თავისი საჯარიმოს კუთხურის ნიშნულთან ახლოს, ნუგო გოგაშვილს აუტიდან გრძელი გადაცემა გაუკეთა, რომელმაც სხვაობა შეამცირა, 1:3. შესვენებამდე ტაბლოზე არაფერი შეცვლილა. მეორე ტაიმში სტუდენტებმა ბევრად უკეთესი თამაში აჩვენეს. სპორტუნიმ საკუთარი კარის დაცვასა და კონტრშეტევებზე გააკეთა აქცენტი. სტუდენტები თავის შანსს დაელოდნენ და დიდხანს ლოდინმაც არ მოუწიათ. 21-ე წუთზე გიორგი გაზდელიანმა მეტოქის იერიში ჩაჭრა და წამოწყებული კონტრშეტევა გოლით დაგვირგვინა, 2:3. ამან ჯორჯიანსელები გაბრაზა და მათ მეტოქეზე ზეწოლა გააძლიერეს. თუმცა, ჯვარაშვილის, ქურდაძის, თოდუასა და ხეჩიკაშვილის დარტყმებს, სტუდენტების მეკარე გიორგი მგელაძე გადაეფარა. 25-ე წუთზე კი ექსეულიძის კონტრიერიშისას ჯორჯიანსელთა მეკარე ალექსანდრე ჯამბურიამ იმარჯვა. სტუდენტებმა კონტრშეტევებზე აქცენტირება გააგრძელეს და 28-ე წუთზე, მორიგი კონტრიერიშისას ექსეულიძემ ზუსტი დარტყმით ანგარიში გაათანაბრა. სპორტუნიმ ქამბექიც შეძლო და განრისხებული მეტოქის წინააღმდეგ, ფრის შენარჩუნება არა მარტო ძირითად დროში, არამედ ორ დამატებით ტაიმშიც მოახერხა, რაშიც მეკარე მგელაძემ ლომის წილი დაიდო. მგელაძემ პენალტების სერიაშიც იმარჯვა. ჯორჯიანსელთაგან, თოდუამ, ჯვარაშვილმა, გაბრიჩიძემ, ხეჩიკაშვილმა და კეკელიამ პენალტები გაიტანეს, სილაგავას დარტყმული კი მეკარე მგელაძემ მოიგერია. სპორტუნიდან, ექსეულიძემ კარს ააცილა, გაზდელიანმა, ბუზიაშვილმა, გოგაშვილმა და მანაგაძემ გაიტანეს. შედეგად პენალტების ძირითად სერიაში, მეტოქეებმა ხუთიდან ოთხი პენალტი გაიტანეს, 4:4. ამის შემდეგ პენალტები თითო გაცუდებამდე გაგრძელდა. კეკელიამ ჯორჯიანსელები დააწინაურა, 4:5, მერე კი მეკარე მგელაძემ იმარჯვა. ჯერ ანგარიში გაათანაბრა (5:5), შემდეგ კი თოდუას დარტყმული მოიგერია და კაპიტან ექსეულიძეს გადამწყვეტი პენალტის შესრულება ხვდა წილად, რომელმაც ეს გამოცდა ჩინებულად ჩააბარა, ცაციათი გაიტანა (6:5) და სპორტუნი ფინალში გავიდა.

მეორე ნახევარფინალური მატჩი, რეგულარული  სეზონის მე-15 ტურის გამეორება გახლდათ, რომელშიც არმიამ პსპ-ს სძლია. არმიელებმა თავიდანვე გამოაჩინეს ბრჭყალები და უკვე მე-14 წამზე ოთარ ბერეჩიკიძემ გახსნა ანგარიში. სამ წუთში კი ბერეჩიკიძის პასი ლაშა ფოფხაძემ შეირგო და სხვაობა გააორმაგა, 0:2.  ფარმაცევტები ამას არ ელოდნენ, მაგრამ არ დაბნეულან, პირიქით მეტოქეს უფრო ორგანიზებულად შეუტიეს და ხუთ წუთში ნიკოლოზ კოპლატაძემ, სხვაობა მინიმუმამდე შეამცირა, 1:2. ამას ორმხრივი შეტევები  მოჰყვა, მაგრამ ანგარიში მხოლოდ ტაიმის მიწურულს შეიცვალა. მე-19 წუთზე გიორგი აფციაურის სოლო-რეიდი მელტონ ახალაიამ გოლით დააგვირგვინა (2:2) და შესვენებაზე მეტოქეები ფრით გავიდნენ. მეორე ტაიმიც ორმხრივი შეტევებით დაიწყო. 27-ე წუთზე ფარმაცევტების შეტევისას მეკარე ტერუნაშვილმა საჯარიმოში ზუნტუროვი წაქცია. დანიშნული პენალტი კი კოპლატაძემ გოლად აქცია და პსპ პირველად წინ გავიდა, 3:2. ამას არმიელებმა მალევე უპასუხეს. 28-ე წუთზე ხაჭაპურიძემ მეტოქეს ბურთი მოპარა, ქუსლით ფოფხაძეს უპასა, რომელმაც ანგარიში გაათანაბრა, 3:3. არმია ამას არ დასჯერდა, შეტევები გაგრძელა და სამ წუთში შაკო ცირამუას დარტყმული მეკარე ფხაკაძემ მოიგერია, მაგრამ დამატებაზე ცირამუამ ყველას დაასწრო და არმია დაწინაურდა, 3:4. წინ არასრული ათი წუთი იყო. ფარმაცევტებმა პრესინგს მიმართეს, პრესინგზე არმიელებსაც არ უთქვამთ უარი. ორმხრივი შეტევების მიუხედავად, ანგარიში აღარ შეცვლილა, არმიამ მოიგო და ფინალში გავიდა.