ფუტსალის მთავარი ლიგის მე-16 ტურის ერთი შეხვედრა გადაიდო და მოგვიანებით გახდება ცნობილი თუ როდის გაიმართება ქუთაისისა და პსპ-ს დაპირისპირება. დანარჩენი სამი მატჩი ჩატარდა და სამივეში სხვადასხვა სახის ფრე დაფიქსირდა. ასე რომ, ფრეების ტური გაიმართა, რომელშიც ზემოთ ნახსენებ გადადებულ მატჩამდე, ორი გუნდი, ცხრილში თითო ქულით დაწინაურდა - კსუ-მ მეორე ადგილზე აინაცვლა, ევროპის უნივერსიტეტმა კი მეშვიდეზე.

ტური არმიასა და თსუ-ს შორის გამართული მატჩით დაიწყო და მიმოხილვამდე ამ გუნდების დაპირისპირებებზე ვთქვათ. ამ გუნდებს შორის, მიმდინარე და წინა სეზონში გამართულ შეხვედრებში, ფრე არ ყოფილა და როგორც ჩანს ფრეს ჯერი დადგა… თამაში ორმხრივი შეტევებით დაიწყო და ორივე გუნდს შეეძლო ანგარიშის გახსნა, მაგრამ პირველი გოლი მხოლოდ ტაიმის ბოლოსკენ გავიდა. მე-8 წუთზე არმიელის დაწინაურება შაკო ცირამუას შეეძლო, მაგრამ მისი დარტყმული ძელმა აისხლიტა. თუმცა, მე-18 წუთზე მეკარე ვახტანგ ტერუნაშვილის წამოწყებული შეტევა, ცირამუამ თავით გატანილი გოლით დააგვირგვინა, 1:0. სტუდენტებმა ამას ორიოდე წუთში უპასუხეს, საბა ეგრისელაშვილმა არმიელთა გადაცემა ჩაჭრა, კაპიტანი გიორგი ჩიმაკაძე მოძებნა და სტუდენტების კაპიტანმა ანგარიში გაათანაბრა, 1:1. მეორე ტაიმი თსუ-მ უფრო აქტიურად დაიწყო და ეს შედეგშიც მალევე აისახა. 22-ე წუთზე ჩიმაკაძემ შორეული ძლიერი დარტყმით სტუდენტები წინ გაიყვანა (1:2) და ბომბარდირთა ცხრილში 19 გოლით პირველ ადგილზე გამაგრდა. არმიელები მდევრის როლს არ შეეგუენ და მეტოქეზე ზეწოლა გააძლიერეს და შედეგიც მოიმკეს. 29-ე წუთზე, ცომაიამ გრძელი გადაცემით გოგსაძეს უპასა, რომლის გამჭოლი პასი ვანო ბექაურმა გოლად აქცია, 2:2. დარჩენილ დროში ორივე გუნდს შეეძლო გატანა, მაგრამ ანგარიშიც აღარ შეცვლილა და შეხვედრა ფრედ, 2:2 დასრულდა.

მოქმედმა ჩემპიონმა გასულ ჩემპიონატში ორჯერ იმარჯვა კსუ-სთან, სტუდენტებმა კი ერთხელ მოიგეს. მიმდინარე სეზონში, პირველ შეხვედრაში გამარჯვება კავკასიელებს დარჩათ, მეორე შეხვედრა კი ფრედ დასრულდა. მოკლედ, ბოლო ორი სეზონების ჩემპიონების დაპირისპირებას ინტრიგა არ აკლდა, ჯორჯიანსელებისა და კსუ-ს დაპირისპირება ტურის ცენტრალურ მატჩად სრულიად დამსახურებულად გახლდათ შერაცხული. კავკასიელებმა მატჩის სტარტზევე გამოაჩინეს ბრჭყალები. პირველივე წუთზე შოთა ჭანუყვაძის პასი, ლაშა სიგუნავამ მახვილი კუთხიდან შეუჩერებლივ კარში გადაგზავნა, მეკარემ ბურთი ვერ შეიმაგრა და კარის ბადეში აღმოჩნდა, 0:1. სტუდენტები ამას არ დასჯერდნენ და მწვავე შეტევები გააგრძელეს. ჯორჯიანსელები უმალ გამოცოცხლდნენ და სწრაფ ტემპში დაწყებული თამაში, სხარტმა შეტევებმა და საგოლე მომენტებმა კიდევ უფრო დაამშვენა. მე-7 წუთზე ტყეშელაშვილის ძლიერ დარტყმას, მეკარე ტყემალაძე გადაეფარა.  ორ წუთში კავკასიელთაგან გიორგი ხაბალაევი არაერთხელ გამოირჩა. კუთხურიდან ჭანუყვაძის მოწოდებულ ბურთს, ხაბალაევმა შეუჩერებლივ, ეფექტური დარტყმით ცხრიანში მიუჩინა ადგილი, 0:2. იმავე წუთზე ხაბალაევმა უკვე დაცვაში იმარჯვა და ჭუმბურიძის სოლო-რეიდისას, კსუ აშკარა გოლისგან იხსნა. ნახევარ წუთში, იმავე ხაბალაევმა კიდევ ერთხელ გაისროლა და ტაიმის შუაწელს კავკასიელებს გვარიანი ფორა შეუქმნა, 0:3 . ჯორჯიანსელთა მონდომებამ ამის შემდეგ გამოიღო ნაყოფი. მე-13 წუთზე მორიგი შეტევისას ვახტანგ ჯვარაშვილმა ძლიერად გაისროლა და ერთი ბურთი გაქვითა, 1:3. ავთანდილ ასათიანის ბიჭებმა მეტოქეზე ზეწოლა გააგრძელეს, მაგრამ სტუდენტების მეკარე თორნიკე ბუკიამ არაერთხელ გადარჩინა თავისი კარი და შესვენებამდე ანგარიში აღარ შეცვლილა. მეორე ტაიმიც ორმხრივი შეტევებით გაგრძელდა, მაგრამ ჯორჯიანსელებმა მეტად იმარჯვეს. ბუკიას თავგანწირული თამაში რომ არა, ნიუ ვიჟენ ჯორჯიანსი დაწინაურდებოდა კიდეც... 32-ე წუთზე, ნიკოლოზ გაბრიჩიძის ძლიერად დარტყმისას ბუკია უძლური აღმოჩნდა და ჯორჯიანსელებმა სხვაობა მინიმუმამდე შეამცირეს, 2:3. ხუთ წუთში ჯვარაშვილმა შორეული, ძლიერი დარტყმით ანგარიში გაათანაბრა, 3:3. დარჩენილი სამწუთნახევარი ორმხრივ შეტევებში, მაგრამ უგოლოდ გაილია და თამაში ფრედ, 3:3 დასრულდა. ეს შედეგი ყველაზე მეტად პსპ-ს აძლევდა ხელს.

ევროპის უნივერსიტეტს შეეძლო ილიაუნთან ჩამორჩენა ხუთიდან ორ ქულამდე შეემცირებინა, მაგრამ გამოცდილ მეტოქესთან ფრე ძლივ გაახერხა. ილიაუნელები სტუდენტურ დერბის მატჩის დასრულებამდე ნახევარი წუთით ადრე, მინიმალურად იგებდნენ კიდეც, მაგრამ... რაოდენ გასაოცარიც არ უნდა იყოს, ბოლო წუთის გარდა, თითქმის მთელი თამაში უგოლოდ მიილია. პირველ ტაიმში ილიაუნს დიდი უპირატესობა ჰქონდა, მაგრამ ევროპელებმა კარის მშრალად შენახვა შეძლეს, რაშიც მათმა მეკარე ბაკურ სანიკიძემ ლომის წილი დაიდო. მეორე ტაიმიც ილიაუნის უპირატესობით დაიწყო, მაგრამ ევროპელებმა ათიოდე წუთში შეძლეს თამაშის გათანაბრება და არაერთი მწვავე შეტევაც შესთავაზეს მეტოქეს. თუმცა, ამ შეხვედრაში გადამწყვეტი ბოლო წუთი აღმოჩნდა. მე-40 წუთზე ილიაუნის შეტევისას ნიკა გვაზავამ გამჭოლი პასით ბექა ონიანი მოძებნა, რომელმაც მახვილი კუთხიდან ანგარიში გახსნა, 0:1. მატჩის გადასარჩენად ევროპელებს არასრული ოცი წამი ჰქონდათ, რომელიც ჩინებულად გამოიყენეს. თამაშის დასრულებამდე 5 წამით ადრე გიორგი ქურხულმა ცენტრსა და საჯარიმოს ორის დანიშნული ჯარიმა, ძლიერი დარტყმით გოლად აქცია. მატჩი ფრედ, 1:1 დასრულდა და მეტოქეებმა მონაგარს თითო ქულა დაუმატეს.