ფუტსალის ლიგის მე-17 ტურში ახალი რეკორდი დაფიქსირდა, კსუ-მ ერთბაშად 13-ბურთიანი სხვაობით იმარჯვა და მეორეზე გამაგრდა. ტურის ცენტრალურ მატჩში საბრძოლო ფრე დაფიქსირდა. არმია მოულოდნელად დამარცხდა და თსუ-მ მეოთხე საფეხურზე პოზიციები გაიმყარა. ეს მოკლედ, უფრო ვრცლად მიმოხილვისას სჯობს თანმიმდევრობას მივყვეთ.

ტური კსუ-სა და ევროპის უნივერსიტეტის სტუდენტური დერბი დაიწყო, რომელიც სარეკორდო აღმოჩნდა. ამ სეზონში სარეკორდო, მე-14 ტურში თსუ-ს მიერ ევროპელების ძლევა გალდათ, როცა თსუ-მ მეტოქე 8 ბურთიანი (9:1) სხვაობით დაამარცხა. კავკასიელებმა კი ეს სარეკორდო სხვაობა 13 გოლამდე გაზარდეს. ანგარიში ევროპელთაგან გიორგი ქურხულმა მე-6 წუთზე გახსნა, მერე კი კსუ-ს ჯერი დადგა. კავკასიელებმა 6 წამში გაათანაბრეს ანგარიში, მაგრამ ამას არ დასჯერდნენ და მეტოქის რბევა დაიწყეს. შესვენებამდე კსუ-მ მოწინააღმდეგე 9 გოლით დასაჯა. მეორე ტაიმი კავკასიელთა სრული უპირატესობით წარიმართა. მათ ანგარიში 13-მდე გაზარდეს და მხოლოდ ამის შედეგ, გივი ყურაშვილმა ერთი ბურთით შეძლო სხვაობის შემცირება, 12:2. კსუ-მ საბოლოოდ ასტრონომიული სხვაობით, 15:2 იმარჯვა. კავკასიელთაგან ნიკა მანგოშვილმა პოკერი გაახერხა, გიორგი ტიკურიშვილმა ჰეთ თრიკი შეასრულა, გიორგი დიაკვნიშვილმა კი დუბლი მიითვალა. ნიკა ხარატიშვილმა, გარი წერეთელმა, ნოდარ ქურცაძემ, ლაშა სიგუნავამ, ლუკა ფარცვანიამ და გიორგი ჭოხონელიძემ, თითო გოლი გაიტანეს.

მომდევნო თამაში ტურის ცენტრალური შეხვედრა გახლდათ, რომელშიც პსპ ნიუ ვიჟენ ჯორჯიანსს დაუხვდა. მიმდინარე სეზონში, ამ გუნდების პირველ მატჩში 4:4 დასრულდა, მეორე თამაში ჯორჯიანსელებმა 3:0 იმარჯვეს. ამჯერად ანგარიში მოქმედ ჩემპიონებმა გახსნეს. მე-7 წუთზე, ჯვარაშვილის გამჭოლი პასი, ნიკოლოზ გაბრიჩიძემ გოლად აქცია, 0:1. ფარმაცევტებმა უფრო მწვავედ შეუტიეს და მალევე უპასუხეს. მე-10 წუთზე ლევან სვანიძემ მეტოქეს ბურთი აართვა და ანგარიში გაათანაბრა, 1:1. პსპ ამას არ დასჯერდა და ოც წამში მალხაზ მურცხვალაძემ ფარმაცევტები წინ გაიყვანა, 2:1. ბესიკ არველაძის ბიჭებმა მეტოქეზე პრესინგი გააგრძელეს. მე-16 წუთზე ახალაიამ პრესინგისას ბურთი მოიპოვა, მისი პასი კი გიორგი კაკულიამ გოლით დააფასა, 3:1. ჯორჯიანსელებმა მეორე ტაიმი უფრო აქტიურად დაიწყეს და 21- წუთზე ირაკლი თოდუამ ანგარიში მინიმუმამდე შეამცირა, 3:2. ხუთიოდე წუთში გაბრიჩიძემ დუბლი მიითვალა და წონასწორობა აღადგინა, 3:3. თამაში ორმხრივი შეტევებით გაგრძელდა და 34-ე წუთზე კაკულიამ, გაბრიჩიძის მსგავსად, დუბლი შეასრულა და ფარმაცევტები ისევ დაწინაურდნენ, 4:3. ჩემპიონები მდევრის როლს არ შეეგუენ და იერიშები გააგრძელეს. კეკელიას პასით გაბრიჩიძემ ჰეთ თრიკი გაახერხა და ეს დაძაბული შეხვედრაც 4:4 დასრულდა.

ამ სეზონში, არმიელებს ილიაუნთან წინა ორივე მატჩი მოგებული ჰქონდათ და სტუდენტებთან ლადო ბურდულის გუნდი ფავორიტად გახლდათ მიჩნეული, მაგრამ ილიაუნელებმა ამჯერად იყოჩაღეს. შეხვედრის პირველი ტაიმი ხისტი აღმოჩნდა. შესვენებამდე ორწუთნახევრით ადრე სტუდენტებმა 5 ჯარიმის ლიმიტი ამოწურეს. არმიელებს შეეძლოთ, პირველ ტაიმში მეტოქეზე უპირატესობა ანგარიშშიც აესახათ და ჯარიმების სიმრავლის გამო დანიშნული პენალტი, მათთვის ჩინებული შანსი იყო, მაგრამ... ამირან ცხომარიამ 10-მეტრიანი ვერ გამოიყენა. მეორე ტაიმიც არმიელთა უპირატესობით დაიწყო, მაგრამ ანგარიში სტუდენტებმა გახსნეს. 23-ე წუთზე თეიმურაზ ექიზაშვილმა სოლო-რეიდი გოლით დააგვირგვინა, 1:0. თამაში ორმხრივი შეტევებით, უფრო საინტერესოდ გაგრძელდა. არმია ანგარიშის გათანაბრებას შეეცადა და მეკარიანად შეუტია. ერთ-ერთი ასეთი შეტევისას, 30-ე წუთზე, ნიკა გვაზავამ მეტოქეს ბურთი აართვა და საკუთარი საჯარიმოდან ზუსტი დარტყმით ცარიელ კარში გაიტანა, 2:0. მატჩის გადასარჩენად არმიას არასრული 11 წუთი ჰქონდა და შეტევები კვლავაც მეკარის თანხლებით გააგრძელა. 33-ე წუთზე უკვე ომარ ასაშვილმა, შორეული ზუსტი დარტყმით, ბურთს მეტოქის ცარიელ კარში მიუჩინა ადგილი, 3:0. მეორე ტაიმიც ხისტად წარიმართა და სტუდენტებმა მატჩის დასრულებამდე 7 წუთით ადრე ამოწურეს ჯარიმების ლიმიტი. 38-ე წუთზე კი სწორედ ჯარიმების ლიმიტის გამო, ილიაუნის კარში კიდევ ერთხელ 10-მეტრიანი დაინიშნა. ამირან ცხომარიამ პენალტით ანგარიშში სხვაობა შეამცირა, 3:1. თუმცა, 12 წამში ნიკა გვაზავამ გაიტანა და თამაშს წერტილი დაუსვა, 4:1. ამ მოგებით, ილიაუნი მე-6 ადგილზე გამაგრდა და წინა საფეხურზე მყოფ არმიასთან ჩამორჩენა 8 ქულამდე შეამცირა.

თსუ-მ ქუთაისს ამ სეზონის პირველ შეხვედრაში კი სძლია, მაგრამ ქუთაისში ფრე მხოლოდ თამაშის ბოლო წუთებზე გაახერხა. შესაბამისად, ამ გუნდების მესამე დაპირისპირებაც საინტერესო უნდა წარმართულიყო და იოლი გასეირნება არცერთს ჰქონია. სასტარტო წუთების შემდეგ სტუდენტებმა მცირედი უპირატესობა მოიპოვეს და ეს გოლითაც გაამყარეს. მე-7 წუთზე ბორის ესებუამ გამჭოლი პასით გახსნა ანგარიში, 1:0. თსუ-ს ანგარიშის გაზრდაც შეეძლო, მაგრამ იმერლები მეკარე ჯუმბერ გულეიშვილმა იხსნა. ორივე კართან არაერთი ხიფათი შეიქმნა, მაგრამ შესვენებამდე ანგარიში აღარ შეცვლილა. მეორე ტაიმიც საინტერესოდ წარიმართა. ის-ის იყო ქუთაისელებმა გოლი მოამწიფეს, რომ 26-ე წუთზე გიორგი ჩიმაკაძემ შორეული ძლიერი დარტყმით გაიტანა (2:0), სეზონის მე-20 გოლი მიითვალა და ბომბარდირთა ცხრილში პირველობა გაიმყარა. იმერლები კიდევ უფრო გააქტიურდნენ და და მეტოქეზე ზეწოლა გააძლიერეს, მაგრამ სტუდენტები დაცვაში საიმედოდ დაუხვდნენ და კონტრშეტევაზე ანერვიულებდნენ მეტოქეს. 37-ე წუთზე ესებუამ კონტრიერიში წამოიწყო და ნოდარ ქურცაძემ გოლით დააგვირგვინა, 3:0, ბოლო წუთზე ესებუამ კიდევ ერთხელ ჩაჭრა იმერელთა იერიში და დუბლი გაიფორმა, 4:0. თსუ-მ არმიელთა მარცხითა და ამ მოგებით ისარგებლა, მეოთხე ადგილზე 3-ქულიანი ფორით გამყარდა.