ფუტსალის თასის გათამაშების ისტორიაში პირველად მოხდა, როცა ქვედალიგოსანი გუნდი ფინალში გავიდა. ეს კი სპორტუნიმ შეძლო, რომელსაც გამოცდილი ბესიკ არველაძე წვრთნის. სპორტუნიმ 1/8 ფინალში, ასევე მეორე ლიგაში მყოფ წალენჯიხას სძლია (4:3), მრისხანე კსუ-ს 1/4 ფინალში მოუგო (9:7), ნახევარფინალში თასის მოქმედ მფლობელ ნიუ ვიჟენ ჯორჯიანსს 3:3 ეთამაშა და პენალტების სერიაში 6:5 იმარჯვა. არმიელებმა 1/8 ფინალი უკონკურსოდ გაიარეს, 1/4 ფინალში ქუთაისი 12:4 დაჯაბნეს, ნახევარფინალში კი პსპ-ს 4:3 მოუგეს.

ფინალამდე ეს გზა განვლეს ფინალისტებმა და დასკვნით აკორდში ტროფეისთვის ერთმანეთს შეეჭიდნენ. ფინალში ფავორიტებად  მაინც არმიელები იყვნენ მიჩნეულნი და ლადო ბურდულის ბიჭებმა ეს როლი ჩინებულად მოირგეს. მე-3 წუთზე თამაზ გოგსაძემ ერთი მეტოქე ჩამოიშორა, მახვილი კუთხიდან ანგარიში გახსნა და არმია დაწინაურდა, 1:0. ზუსტად 5 წუთში გოგსაძის გამჭოლი პასით ლაშა ფოფხაძემ ფორა გააორმაგა, 2:0. სპორტუნიც არ ყოფილა უქმად და წუთნახევარში მოწინააღმდეგეს უპასუხა - გიორგი ექსეულიძის პასით, ნუგო გოგაშვილმა ანგარიშში სხვაობა მინიმუმამდე შეამცირა (2:1) და ტაიმიც ასე დასრულდა.

მეორე ტაიმი არმიელებმა უკეთ ჩაატარეს და ეს შედეგშიც აისახა. 24-ე წუთზე, გოგსაძის მიერ კუთხურიდან ჩაწოდებულ ბურთს, ლაშა ფოფხაძემ  სტუდენტების კარში მიუჩინა ადგილი და არმიელებმა ორბურთიანი ფორა აღადგინეს, 3:1. ამას ათწუთიანი მშრალი პერიოდი მოჰყვა და 35-ე წუთზე ბაკურ ნანეიშვილის პასით, შაკო ცირამუამ არმიას უპირატესობას სოლიდური სახე მისცა, 4:1. ამას სტუდენტებმა მალევე უპასუხეს. ნუგო გოგაშვილის დარტყმული ბურთი არმიელთა კიპერმა ვახტანგ ტერუნაშვილმა მოიგერია, მაგრამ დამატებაზე გიორგი მანაგაძემ ანგარიშში სხვაობა შეამცირა, 4:2. სპორტუნი ბურთის კონტროლსა და უპირატესობის მოპოვებას შეეცადა, მაგრამ არმიამ იძალა. ბოლოსწინა წუთზე გოგსაძის პასით გიგა ბერაიამ საბოლოო ანგარიში დააფიქსირა. არმიამ 5:2 იმარჯვა და ილიაუნისა და ნიუ ვიჟენ ჯორჯიანსის შემდეგ, ფუტსალის თასს დაეუფლა.