ფუტსალის უმთავრეს ლიგაში რეგულარული სეზონი დასრულდა და ფლეი ოფი, 1/4 ფინალური მატჩებით დაიწყო. რეგლამენტის  მიხედვით, ნახევარფინალის საგზურისთვის მეოთხე და მეხუთე ადგილზე გასული გუნდები, თსუ და არმია დაუპირისპირდნენ ერთმანეთს. მეორე წყვილში კი მესამეზე გასული პსპ და მეექვსეზე მყოფი, ლიგის დებიუტანტი ქუთაისი იყვნენ.

პირველები თსუ და არმია შეეჭიდნენ ერთმანეთს. რეგულარულ სეზონში ამ გუნდებმა თითოჯერ დაამარცხეს ერთმანეთი, მესამე შეხვედრა კი ფრედ დასრულდა. მატჩის პირველი ნახევარი, გარდამავალი უპირატესობით წარიმართა და ეს ანგარიშშიც აისახა. მე-5 წუთზე საბა მაჩიტიძემ გახსნა ანგარიში და სტუდენტები დააწინაურა, 1:0. გაშვებულმა გოლმა ლადო ბურდულის ბიჭები გაახელა და მათ ოთხიოდე წუთში უპასუხეს მეტოქეს - მე-9 წუთზე გიგა ბერაიამ წონასწორობა აღადგინა, 1:1. თუმცა, წუთიც არ გასულა და საბა ეგრისელაშვილმა თსუ ისევ წინ გაიყვანა, 2:1. ტაიმის დასრულებამდე ათი წამით ადრე, არმიელთა კაპიტანმა გიგა ბერაიამ კიდევ ერთხელ გაათანაბრა ანგარიში. მეორე ტაიმში სტუდენტებმა მეტოქე დაჯაბნეს. საწყის 5 წუთში, საბა მაჩიტიძემ კიდევ ორი გოლი გაიტანა. მეტიც, მაჩიტიძე ამას არ დასჯერდა, 32-ე წუთზეც გაიტანა და თსუ-ს გვარიანი ფორა შეუქმნა, 5:2. ორიოდე წუთში სტუდენტების კაპიტანმა გიორგი ჩიმაკაძე თავისი შანსი გამოიყენა. 37-ე წუთზე კი ბორის ესებუამ სხვაობა სოლიდური გახადა, 7:2. ბოლო წუთზე შაკო ცირამუამ ერთი ბურთის გაქვითვა შეძლო. თსუ-მ პირველი მატჩი 7:3 მოიგო და ნახევარფინალისკენ დიდი ნაბიჯი გადადგა, რაშიც 5 გოლის გატანით, საბა მაჩიტიძემ ლომის წვლილი შეიტანა.

1/4 ფინალის კიდევ ერთ შეხვედრაში, პსპ ლიგის დებიუტანტ ქუთაისს დაუხვდა. ცნობისათვის, ბოლო ტურამდე ზედიზედ 3 მატჩის მოგებით, იმერლები ჯერ ავტომატურ დაქვეითებას, მერე კი ფლეი აუტს ასცდნენ და ფლეი ოფში თამაშის უფლება მოიპოვეს. სხვათა შორის, ქუთათურებმა მე-16 ტურში შინ, სწორედ პსპ-ს მოუგეს. თუმცა, რეგულარული სეზონის წინა ორივე მატჩში ფარმაცევტებთან დამარცხდნენ. ქუთაისი ამჯერადაც შეეცადა მრისხანე პსპ-ს გაწბილებას და თამაში წარმატებულად დაიწყო. მე-3 წუთზე ლაშა გელოვანმა გახსნა ანგარიში და ქუთათურები დააწინაურა, 0:1. ფარმაცევტები გაბრაზდნენ, მეტოქეზე ზეწოლა გააძლიერეს და მე-8 წუთზე ლევან სარდანაშვილმა ანგარიში გაათანაბრა, 1:1. ტაიმის  მიწურულს ირაკლი გვეტაძემ იმერლები ისევ წინ გაიყვანა, 1:2. ფარმაცევტებმა მეორე ტაიმი უფრო შედეგიანად ჩაატარეს. 21-ე წუთზე პსპ-ს შეტევისას, იმერელთაგან გიორგი ბედენაშვილს მოხვდა  ბურთი და კარში აღმოჩნდა, 2:2. ექვს წუთში გიორგი რევიშვილმა ქუთაისი მაინც წინ გაიყვანა, 2:3. მერე კი ბესიკ არველაძის ბიჭების ჯერი დადგა.  28-ე და 29-ე წუთებზე გატანილი ბურთებით მელტონ ახალაიამ დუბლი შეასრულა და ფარმაცევტები დაწინაურდნენ, 4:3. წუთის შემდეგ კი ლევან სარდანაშვილმა მეორე გოლის გატანით, ახალაიას მსგავსად დუბლი მიითვალა. პსპ-მ 5:3 იმარჯვა და ნახევარფინალს მიუახლოვდა, მაგრამ 26 აპრილს იმერლებთან ქუთაისში რთული საპასუხო მატჩი ელის.