პლეი ოფის სტარტზე, საბა მაჩიტიძის პოკერის წყალობით, თსუ-მ არმიას 7:3 სძლია და ნახევარფინალისთვის ბრძოლაში დაწინაურდა. თუმცა, რეგლამენტის მიხედვით, ნახევარფინალში გასვლისთვის ორი მოგებაა საჭირო და ეს გუნდები კიდევ ერთხელ დაუპირისპირდნენ ერთმანეთს. თამაში საშუალო ტემპში დაიწო და მეტოქეებს სიფრთხილე ეტყობოდათ, რასაც გარდამავალი უპირატესობა მოჰყვა. შესვენებამდე არმიელებმა იძალეს, მაგრამ ტაიმი უგოლოდ დასრულდა. მეორე ტაიმის პირველივე წუთზე არმიელები დაწინაურდნენ, ანგარიში ლაშა ფოფხაძემ გახსნა, 1:0. ლადო ბურდულის ბიჭებმა სტუდენტებს ამოსუნთვის საშუალება არ მისცეს და წუთნახევარში, თამაზ გოგსაძის პასით, 23-ე წუთზე ლაშა ფოფხაძემ დუბლი შეასრულა, 2:0. რა თქმა უნდა, თსუ მატჩის გადარჩენას შეეცადა. საამისოდ სტუდენტებს საკმაო დრო ჰქონდათ, მაგრამ მჭიდრო პრესინგით არმიელებმა მეტოქე შებოჭეს. თსუ ვა-ბანკზე წავიდა, მეკარიანად შეუტია და არმიას ბარე სამჯერ შეეძლო ცარიელ კარში გატანა და აქედან ერთი შანსი გამოიყენა კიდეც. 31-ე წუთზე შაკო ცირამუამ საბოლოო ანგარიში, 3:0 დააფიქსირა. არმიამ თსუ-სთან ფლეი ოფის სერიაში გაათანაბრა. ამ წყვილიდან ნახევარფინალში გამსვლელი გუნდის ვინაობა 1 მაისს, მესამე მატჩში გაირკვევა.

1/4 ფინალური სერიის პირველ შეხვედრაში პსპ-მ ქუთაისს თბილისში 5:3 სძლია და ნახევარფინალს მიუახლოვდა. ფარმაცევტებმა მეორე მატჩი ქუთაისში გამართეს და სტუმრადაც იმარჯვეს. ბესიკ არველაძის ბიჭები ტაიმის შუაწელს დაწინაურდნენ. მე-10 წუთზე ნიკოლოზ კურტანიძემ საჯარიმო დარტყმით გახსნა ანგარიში, 0:1. სტუმრები ამას არ დასჯერდნენ და 15 წამში, მეკარესთან პირისპირ გასულმა მიხეილ თევზაძემ სხვაობა გააორმაგა, 0:2. იმერლებს ქამბექისთვის არასრული ტაიმნახევარი ჰქონდათ. ქუთათურებს ჯერ კიდევ შესვენებამდე შეეძლოთ პსპ-ს კარის აღება, მაგრამ ეს ვერ შეძლეს. 27-ე წუთზე მალხაზ შამილაძემ ანგარიშში სხვაობა კიდევ გაზარდა, 0:3. ორიოდე წუთში კი ნიკოლოზ კოპლატაძემ ძლიერი დარტყმით ანგარიში სოლიდური გახადა, 0:4. ამის შემდეგ იმერლების ჯერი დადგა. 32-ე და 33-ე წუთებზე, შესაბამისად ირაკლი გვეტაძემ და სერგეი პიჩუგინმა თითო ბურთი გაიტანეს და სხვაობა ორამდე შეამცირეს.  თუმცა, 37-ე წუთზე მელტონ ახალაიამ საბოლოო , 2:5 დააფიქსირა. პსპ-მ ფლეი ოფის 1/4 ფინალში ზედიზედ ორი მატჩი მოიგო და ნახევარფინალში გავიდა.