როგორც უკვე გაუწყეთ, ფლეი ოფის 1/4 ფინალში პსპ-მ, ლიგის დებიუტანტ ქუთაისს, ზედიზედ ორივე მატჩი (5:3; 2:5) მოუგო და ნახევარფინალში გავიდა, სადაც მეტოქედ კსუ ელოდა. მეორე წყვილში, თსუ-სა და არმიას დაპირისპირებაში, ჯერ სტუდენტებმა იმარჯვეს (7:3), მერე არმიალებმა (3:0) და გამარჯვებულის გამოსავლენად გადამწყვეტი მატჩი შედგა. თავიდანვე ცნობილი იყო, რომ გამარჯვებულს, მოქმედ ჩემპიონ ნიუ ვიჟენ ჯორჯიანსთან მოუწევდა შერკინება.

თავიდანვე უნდა ითქვას, რომ თამაში დაძაბული და საინტერესო გამოდგა. საგოლე მომენტები ორივე კართან არაერთი შეიქმნა. იყო ეპიზოდები, როცა მოწინააღმდეგეთა კარი ძელმა იხსნა. კარის ხაზიდანაც გამოიტანეს მცველებმა. ამას, ორივე გუნდის მეკარის საიმედო თამაშიც დაემატა და პირველი ტაიმი თითქმის უგოლოდ წარიმართა. თუმცა, ბოლო წუთზე, სტუდენტების კაპიტანმა მეურვე ჩამოიცილა, სივრცე გაითავისუფლა და ძლიერი დარტყმით ანგარიში გახსნა - თსუ შესვენებაზე ფორით გავიდა, 1:0. 

მეორე ტაიმი შედარებით უხვგოლიანი გამოდგა. სტუდენტებმა მეტოქეს სივრცე დაუთმეს და სწრაფ კონტრშეტევაზე გააკეთეს აქცენტი. მათმა ამ ჩანაფიქრმა გაამართლა. 27-ე წუთზე საბა მაჩიტიძემ არმიელთა იერიში ჩაჭრა, მეკარესთან პირისპირ გავიდა და სხვაობა გააორმაგა, 2:0. ზუსტად ნახევარ წუთში მაჩიტიძემ ისევ მეტოქის შეტევა ჩაჭრა და დუბლი მიითვალა, 3:0. არმიელებიც არ იყვნენ უქმად. მათ უფრო მწვავედ შეუტიეს და 32-ე წუთზე ცირამუა-ნანეიშვილის იერიში გურამ ხაჭაპურიძემ დააგვირგვინა, 3:1. არმიას იერიშებში მეკარე ვახტანგ ტერუნაშვილი ისევ ჩაერთი, რითაც სტუდენტებმა კარგად ისარგებლეს. ნახევარ წუთში ჩიმაკაძემ არმიელთა გადაცემა ჩაჭრა და საბოლოო ანგარიში დააფიქსირა, 4:1.

თბილისის ოლიმპიურ სასახლეში, ფლეი ოფის ნახევარფინალური მატჩები 8 და 12 მაისს გაიმართება.