ფუტსალის ლიგის მოქმედი ჩემპიონი და ახლახანს დასრულებული რეგულარული სეზონის გამარჯვებული ნიუ ვიჟენ ჯორჯიანსს, ნახევარფინალში მეტოქედ თსუ ერგო. სტუდენტებმა არმიას ბარიერი გადალახეს და მრისხანე ჯორჯიანსელებსაც არ შეეპუენ და ტაიმნახევრის განმავლობაში თამაშს იგებდნენ. თუმცა, სჯობს თანმიმდევრობას მივყვეთ. მატჩი დაძაბული გამოდგა. სტარტზე სტუდენტებმა იყოჩაღეს და მე-4 წუთზე ბორის ესებუამ გახსნა ანგარიში, 0:1. ავთანდილ ასათიანის ბიჭები ანგარიშის გათანაბრებას შეეცადნენ, მაგრამ შესვენებამდე არაფერი შეცვლილა. მეორე ტაიმი უფრო დრამატული აღმოჩნდა. სტარტზე შედეგიანობით ისევ თსუ გამოირჩა და 22-ე წუთზე საბა მაჩიტიძემ სტუდენტების ფორა გააორმაგა, 0:2. ჯორჯიანსელები ორბურთიან ჩამორჩენას არ შეეგუენ და 32-ე წუთიდან მათი უპირატესობა თამაშშიც ეტაპობრივად აისახა. 32-ე წუთზე ვახტანგ ჯვარაშვილმა სხვაობა მინიმუმამდე შეამცირა, 1:2. წუთში კი გიორგი ქურდაძემ ანგარიში გაათანაბრა, 2:2. ხუთ წუთში ნიკოლოზ გაბრიჩიძემ ჯორჯიანსი წინ გაიყვანა, 3:2. დარჩენილ ორ წუთში ანგარიში აღარ შეცვლილა.ნიუ ვიჟენ ჯორჯიანსმა ნახევარფინალური სერიის პირველი მატჩი მოიგო და ფინალს მიუახლოვდა.

უფრო უხვგოლიანი გამოდგა ნახევარფინალური სერიის მეორე მატჩი, რომელშიც კსუ პსპ-ს შეეჭიდა. ფარმაცევტებმა თავიანტ გამარჯვებას პირველივე ტაიმში დაუდეს სათავე. პირველივე წუთზე ლევან სვანიძის მიერ გახსნილ ანგარიშს, მესამე წუთზე ნიკოლოზ კოპლატაძემ ერთი გოლი შეაშველა, 0:2. კავკასიელები ქამბექს შეცადნენ და მეკარიანად შეუტიეს, რითაც პსპ-მ კარგად ისარგებლა. მე-11 წუთზე, ფარმაცევტების კიპერმა ნიკოლოზ ფხაკაძემ, მეტოქის დარტყმული ბურთი აიღო და უმალ ცარიელ კარში ძლიერი დარტყმით გადაგზავნა, 0:3. ტაიმის ბოლო წუთზე კოპლატაძემ მეორეც გაიტანა და შესვენებაზე პსპ გვარიანი ფორით გავიდა, 0:4. მატჩის გადარჩენას კსუ მეორე ტაიმშიც შეეცადა. 25-ე წუთზე ნიკა ხარატიშვილმა ერთი ბურთი გაქვითა. ხუთ წუთში ლუკა ფარცვანიამ სხვაობა ორამდე შეამცირა, 2:4. კავკასიელებმა მეკარიანად შეტევები გააგრძელეს. ერთ-ერთი ასეთი იერიში ფარმაცევტებმა ჩაჭრეს, კოპლატაძემ კი შორეული ზუსტი დარტყმით, ჰეთ-თრიკიც მიითვალა და საბოლოო ანგარიშიც დაფიქსირა, 2:5.

ჯორჯიანსელები და პსპ სერიაში დაწინაურდნენ. ნახევარფინალის მეორე მატჩები 12 მაისს გაიმართება. ვნახოთ, გაცხადდება თუ არა პარასკევს რომელიმე ფინალისტი...