ფუტსალის ლიგის ფინალისტების ვინაობა მეორე ნახევარფინალურ სერიაში გაცხადდა. პსპ-მ და ნიუ ვიჟენ ჯორჯიანსმა, ნახევარფინალის პირველი მატჩების მოგებით, ფინალისკენ დიდი ნაბიჯი გადადგეს და შედეგიანი სტარტი წარმატებულად გააგრძელეს.

პსპ-სა და კსუ-ს დაპირისპირებაში, მეორე მატჩიც დაძაბულად წარიმართა. უგოლო პირველი ტაიმის შემდეგ, მეორე ნახევარში ფარმაცევტები დაწინაურდნენ - მიხეულ თევზაძემ 24-ე წუთზე ანგარიში გახსნა, 1:0. ამას კავკასიელებმა წუთში უპასუხეს და საბა ტყეშელაშვილმა წონასწორობა აღადგინა, 1:1.  ნელ-ნელა, მეტოქეებში ვნებათაღელვამ და ხისტმა თამაშმა იმატა და ეს გაფრთხილებების სიმრავლეში აისახა კიდეც. პირველი მარცხის გამო სტუდენტებს რევანში სწყუროდათ, კსუ-მ მეტოქეზე ზეწოლა გააძლიერა და 28-ე წუთზე ლაშა სიგუნავას გოლით დაწინაურდა, 1:2. ამან ფარმაცევტები გაახელა. კავკასიელებმა გაფრთხილებების ლიმიტი ამოწურეს და პსპ-მ 10-მეტრიანის შესრულების უფლება მოიპოვა. თუმცა, პენალტისას, ნიკოლოზ კურტანიძის დარტყმული ბურთი ძელმა აისხლიტა. მატჩის ბოლოსწინა წუთზე გიორგი ზუნტუროვის გრძელი პასი მალხაზ შამილაძემ გოლად აქცია (2:2) და თამაში დამატებით დროში გადაზარდა. 3-3 წუთიან ორ ტაიმში არაფერი შეცვლილა და ჯერი პენალტების სერიაზე მიდგა. 5-5 პენალტიდან მეტოქეებმა ორ-ორი გააცუდეს. კსუ-დან ხაბალაევმა, მანგოშვილმა და ხარატიშვილმა გაიტანეს. პსპ-დან კი გოლები კურტანიძემ, მურცხვალაძემ და ზუნტროვმა მიითვალეს, 3:3. პენალტების სერია თითო დარტყმებით გაგრძელდა. ფარცვანიამ სტუდენტები დააწინაურა, 3:4, პსპ-დან სარდანაშვილმა გაათანაბრა, 4:4. თუმცა, კსუ-მ მომდევნო პენალტი გააცუდა, ფარმაცევტებს მსხნელად კვლავ შამილაძე მოევლინა, რომლის შედეგიანი პენალტით (5:4) პსპ ფინალში პირველად გავიდა.

ჯორჯიანსელებმა თსუ-ს პირველ ნახევარფინალურ შეხვედრაში 3:2 სძლიეს და მეორე შეხვედრაშივე შეეცადნენ ფინალის საგზურის გაფორმებას. ავთანდილ ასათიანის ბიჭებმა ეს შეძლეს კიდეც. მე-5 წუთზე დავით ხეჩიკაშვილმა ანგარიში გახსნა, 0:1. ოთხ წუთში შოთა თოფურიამ სხვაობა გააორმაგა, 0:2. კიდევ ორ წუთში, ნიკოლოზ გაბრიჩიძემ ფორა გაზარდა, 0:3. გავიდა კიდევ 5 წუთი და ვახტანგ ჯვარაშვილმა სხვაობა სოლიდური გახადა, 0:4. თსუ-ს მატჩის გადასარჩენად 3 წუთზე მეტი და სრული მეორე ტაიმი ჰქონდა. შესაბამისად, სტუდენტებმა ანგარიშის გათანაბრება ჩაიფიქრეს და ჩანაფიქრის რეალობად ქცევისთვის მცირედი დაკლდათ. 27-ე და 28-ე წუთზე გატანილი გოლებით, გიორგი ჩიმაკაძემ დუბლი შეასრულა, 2:4. შვიდ წუთში საბა მაჩიტიძემ ანგარიშში სხვაობა მინიმუმამდე შეამცირა, 3:4. მერე ჯორჯიანსელთა ჯერი დადგა. მატჩის მიწურულს ვახტანგ კეკელიამ დუბლი მიითვალა და მატჩს წერტილი დაუსვა, 3:6. მოქმედი ჩემპიონი ნიუ ვიჟენ ჯორჯიანსი ზედიზედ მეორედ ფინალში გავიდა. 2021 წლის სეზონის ვიცე-ჩემპიონ თსუ-ს, მესამე ადგილისთვის, შარშანწინდელ ჩემპიონ კსუ-სთან მოუწევს დაპირისპირება.