ფუტსალის უმთავრეს ლიგაში, 2022-2023 წლების სეზონი დასკვნითი  ეტაპი ფინალური სერიით დაიწყო. რეგლამენტის მიხედვით, ჩემპიონობისთვის ფინალისტს სამი მოგება სჭირდება. საამისოდ კი ნიუ ვიჟენ ჯორჯიანსი და პსპ იბრძოლებენ. რეგულარული სეზონის გამარჯვებულმა და მოქმედმა ჩემპიონმა, ნიუ ვიჟენ ჯორჯიანსმა, ნახევარფინალში თსუ-ს ზედიზედ ორ მატჩში სძლია. პსპ-მ უფრო გრძელი გზა გაიარა. ბესიკ არველაძის ბიჭებმა, ზედიზედ ორი მატჩი მოუგეს ჯერ 1/4-ფინალში ქუთაისს, კსუ-ს კი ნახევარფინალში. სეზონის ორი უძლიერესი გუნდი, ფინალში დამსახურებულად გავიდა და ახლა საინტერესოა, ვინ აღმართავს ჩემპიონის ტროფეის, კვლავ ჯორჯიანსი უკვე მეორედ თუ პსპ პირველად?

ამ გუნდებს შორის, რეგულარული სეზონის ორ შეხვედრაში საბრძოლო ფრე 4:4 დაფიქსირდა. მესამე თამაშში კი ჯორჯიანსელებმა იმარჯვეს (3:0). ამ მეტოქეთა მორიგი მატჩი, ფინალური სერიის საკადრისად, დაძაბული და საინტერესო გამოდგა. მეტოქეები საკუთარი კარის უსაფრთხოებაზე ზრუნავდნენ, მაგრამ თამაშს სილაღე, დრამატიზმი და გამორჩეული შეტევებიც არ აკლდა. ანგარიშის გახსნა ორივე გუნდს შეეძლო, მაგრამ მეკარეების საიმედო თამაშის წყალობით, საწყისმა ათმა წუთმა მშრალად ჩაიარა. მე-11 წუთზე ირაკლი თოდუას მიერ კუთხურიდან მოწოდებული ბურთი, მალხაზ შამილაძეს მოხვდა და რიკოშეტით კარში აღმოჩნდა. ჯორჯიანსელები დაწინაურდნენ, 1:0. მიღებული გოლის შემდეგ პსპ-მ უფრო მწვავედ და მწობრად შეუტია და შედეგიც მალევე მოიმკა. მე-13 წუთზე მიხეილ თევზაძემ ჯარიმიდან გამჭოლი პასით ლევან სარდანაშვილი მოძებნა და ანგარიში გათანაბრდა, 1:1. თამაში ორმხრივი შეტევებით წარიმართა, მაგრამ შესვენებამდე არაფერი შეცვლილა. მეორე ტაიმშიც ორივე გუნდის კართან არაერთი ხიფათი შეიქმნა. 26-ე წუთზე ვახტანგ ჯვარაშვილმა საჯარიმოში მწვავედ ჩააწოდა, სადაც ნიკოლოზ გაბრიჩიძემ ყველას დაასწრო და ჯორჯიანსი დაწინაურდა, 2:1. ავთანდილ ასათიანის ბიჭები ამას არ დასჯერდნენ, მწვავე იერიშები გააგრძელეს და შედეგიც მოიმკეს. 33-ე წუთზე შოთა თოფურიას პასით, ვახტანგ კეკელიამ მახვილი კუთხიდან ეფექტური გოლი გაიტანა და ჯორჯიანსელთა ფორა გაზარდა, 3:1. პსპ-ს მატჩის გადასარჩენად საკმაო დრო ჰქონდა, მაგრამ შედეგი აღარ შეცვლილა. ნიუ ვიჟენ ჯორჯიანსი ფინალური სერიაში დაწინაურდა. ვნახოთ, ვინ იმარჯვებს მეორე შეხვედრაში, რომელიც 26 მაისს გაიმართება.

მთავარ ლიგაში ადგილის შესანარჩუნებლად, რეგულარული სეზონის მე-7 ადგილოსან ილიაუნს, ქვედა ლიგის მეორეადგილოსან გორთან დაპირისპირება ერგო. ილიაუნმა, რომელმაც 2021 წელს ფუტსალის თასი მოიპოვა, ფლეი აუტის პირველივე მატჩში ჩაიფიქრა უპირატესობის დაფიქსირება და ეს მოახერხა კიდეც. მე-6 წუთზე რომან კუხიანიძემ მახვილი კუთხიდან გახსნა ანგარიში, 1:0. ოთხ წუთში, თეიმურაზ ექიზაშვილმა მეორე საგოლე გადაცემა გააკეთა და ბექა ონიანმა სხვაობა გააორმაგა, 2:0.  სტუდენტები ამას არ დასჯერდნენ და მე-19 წუთზე სხვაობა სოლიდური გახადეს. გორელთა კიპერმა ომარ ასაშვილის დარტყმული ბურთი მოიგერია, მაგრამ დამატებაზე ლაშა კურტანიძემ ყველას დაასწრო, 3:0. მეორე ტაიმი სტუმრებმა უკეთ დაიწყეს და სტარტზევე ივანე ნონიკაშვილმა შორეული ძლიერი დარტყმით, ერთ ბურთი გაქვითა, 3:1. გორელები კვლავ შეეცადნენ ამგარიშში სხვაობის შემცირებას, მაგრამ 24-ე წუთზე ლაშა კურტანიძემ მეორე გოლი გაიტანა და სამბურთიანი ფორა აღადგინა. მატჩის ბოლოს კი, კურტანიძის მსგავსად, კუხიანიძემაც დუბლი შეასრულა (5:1). ილიაუნმა ფლეი აუტის პირველი მატჩი მოიგო და ლიგაში ადგილის შესანარჩუნებლად დიდი ნაბიჯი გადადგა. ახლა საინტერესოა ვინ გაიხარებს, ფლეი აუტის მომდევნო მატჩში, რომელიც ასევე 26 მაისს გაიმართება.