ფუტსალის ლიგის რეგლამენტის  მიხედვით, ჩემპიონის ტიტულისთვის გუნდს, ფინალურ სერიაში სამი მოგება ესაჭიროება. მოქმედმა ჩემპიონმა ნიუ ვიჟენ ჯორჯიანსმა ფინალური სერიის პირველი შეხვედრა მოიგო და მეორე მატჩშიც გამარჯვება იზეიმა. ჯორჯიანსისა და პსპ-ს მეორე დაპირისპირებაც დაძაბულად და საინტერესოდ დაიწყო და უფრო საინტერესოდ გაგრძელდა. მე-9 წუთზე, ირაკლი თოდუას მიერ მახვილი კუთხიდან დარტყმული ბურთი, ფარმაცევტების მეკარე გიორგი ემუხვარმა თითქოსდა მოიგერია, მაგრამ ვერ შეიმაგრა და ანგარიშიც გაიხსნა, 0:1. ავთანდილ ასათიანის ბიჭები ამას არ დასჯერდნენ, მეტოქეზე ზეწოლა გააგრძელეს და ანგარიშიც არაერთხელ გაზარდეს, მეათე წუთზე ნიკოლოზ გაბრიჩიძემ, ფორა გააორმაგა, 0:2. ფარმაცევტები მდევრის როლს არ შეეგუვნენ, მაგრამ ჯორჯიანსელებმა დაცვაშიც საიმედოდ ითამაშეს. უფრო მეტიც, ტაიმის მიწურულს კიდევ ორჯერ დალაშქრეს მეტოქის კარი. მე-17 წუთზე მეკარე ბექა ტყემალაძის გრძელი პასისას, გაბრიჩიძემ მეტოქის მეკარესა და მცველს დაასწრო და დუბლი მიითვალა, 0:3. ოციოდე წამში, პსპ-ს მორიგი შეტევისას, მეკარე ტყემალაძემ ბურთი მოიგერია, გიორგი ქურდაძემ ბრაზილიელი კარლოს სანტოსი მოძებნა, რომელმაც საკუთარი საჯარიმოდან დაწყებული შეტევა გოლით დაგვირგვინა, 0:4. ფარმაცევტებს მატჩის გადასარჩენად 3 წუთი და სრული მეორე ტაიმი ჰქონდათ, მაგრამ მხოლოდ ერთი გოლის გაქვითვა შეძლეს. 26-ე წუთზე ნიკოლოზ კურტანიძემ სხვაობა სამ ბურთამდე შეამცირა (1:4) და თანაგუნდელებს იმედი ჩაუსახა. თუმცა, წუთნახევარში დავით ხეჩიკაშვილმა ოთხბურთიანი ფორა აღადგინა, 1:5. სამ წუთში, ვახტანგ ჯვარაშვილის გამორჩეული პასი, ვახტანგ კეკელიამ გოლით დაფასა, 1:6. პსპ-ს ხუთბურთიანი სხვაობის გასაქვითად ათი წუთი ჰქონდა, მაგრამ ანგარიში აღარ შეცვლილა. ჯორჯიანსელებმა მეორედაც იმარჯვეს და საჩემპიონო ტროფეის კიდევ ერთხელ აღმართვისთვის ერთი მოგება სჭირდებათ. ფინალური სერიის მესამე მატჩი 31 მაისს გაიმართება და ვნახოთ, მაისშივე იზეიმებს ჩემპიონი თუ ივნისში აღმართავს ტროფეის.

ილიაუნსა და გორს შორის ფლეი აუტის სერიის მეორე მატჩს, გორის სპორტის სასახლემ უმასპინძლა. შიდაქართლელებმა, საკუთარ კედლებში უკეთ დაიწყეს თამაში, მაგრამ სტუდენტებმა, პირველ ტაიმში კარის მშრალად შენახვაც შეძლეს და შესვენებამდე დარჩენილ 5 წუთში გვარიანი ფორაც მოიპოვეს. მე-15 წუთზე ომარ ასაშვილის პასით ნიკა გვაზავამ გახსნა ანგარიში, 0:1. ამას ორ წუთში ასაშვილმა ორი გოლი მიაყოლა, 0:3. ტაიმის ბოლოსწინა წუთზე კი ბექა ონიანმა სხვაობა კიდევ გაზარდა, 0:4. შესვენების შემდეგ, 24-ე წუთზე დავით ადუაშვილის მიერ წამოწყებული იერიში, ლუკა მაყიშვილმა ეფექტური გოლით დააგვირგვინა, 1:4. ხუთ წუთში თეიმურაზ ექიზაშვილმა საჯარიმო დარტყმით, ოთხბურთიანი სხვაობა აღადგინა, 1:5. ზუსტად წუთში ილია ლუკაშვილმა კიდევ ერთი ბურთი გაქვითა (2:5) და გორელებს სამბურთიანი ჩამორჩენის აღმოსაფხვრელად ათი წუთი ჰქონდათ. თუმცა, ამ დროში ილაუნმა, ბენეფისი მოიწყო - ბექა ონიანის, ნიკა გვაზავას, ომარ ასაშვილის, ლაშა კურტანიძისა და რომან კუხიანიძის გოლებით, სტუდენტებმა სოლიდური სხვაობით, 2:10 იმარჯვეს. ილიაუნმა ჯამში ორჯერ სძლია მეტოქეს და ფუტსალის უმთავრეს ლიგაში ადგილი შეინარჩუნა.