ფუტსალის უმთავრესი ლიგის 2022-23 წლების სეზონი, ნიუ ვიჟენ ჯორჯიანსის ტრიუმფით დასრულდა. ფუტსალის ლიგას ძველი-ახალი ჩემპიონი ჰყავს. ჯორჯიანსელებმა საჩემპიონო ტახტი არ დათმეს და ტროფეი ზედიზედ მეორედ აღმართეს. ავთანდილ ასათიანის გუნდი კვლავაც საუკეთესოა.

ფინალური სერიის პირველი ორი მატჩის მოგებით, ჯორჯიანსელები ოქროს მედლებთან ახლოს იყვნენ და ეს შანსი ხელიდან არ გაუშვეს. ფინალური სერიის მესამე შეხვედრაში, პსპ უფრო მობილიზებული წარსდგა. ფარმაცევტები დაცვაში საიმედო თამაშით იგერიებდნენ მრისხანე ნიუ ვიჟენის იერიშებს და მწვავე კონტრშეტევებსაც ახორციელებდნენ. მე-7 წუთზე, პსპ-ს კაპიტანმა ლევან სარდანაშვილმა მეტოქის იერიში ჩაჭრა, ქუსლური პასით მიხეილ თევზაძე მეკარესთან პირისპირ გაიყვანა, რომელმაც ანგარიში გახსნსა, 0:1. ნიუ ვიჟენმა მეტოქის აფეთქება ჩააცხრო, თამაშის სადავეებს დაეუფლა და მასირებული შეტევებით ანგარიშის გათანაბრებას შეეცადა. მოქმედი ჩემპიონებს არათუ გათანაბრება, დაწინაურებაც არაერთხელ შეეძლოთ, მაგრამ პსპ-ს მეკარე ნიკოლოზ ფხაკაძემ არაერთი მკვდარი ბურთი მოიგერია. ჯორჯიანსელთა გარჯამ, ტაიმის ბოლოს მაინც გამოიღო შედეგი. შესვენებამდე ნახევარი წუთით ადრე, ვახტანგ კეკელიას მიერ საჯარიმოში გაკეთებული გამჭოლი პასი, ირაკლი თოდუამ ქუსლით გატანილი ეფექტური გოლით დააგვირგვინა, 1:1. მეორე ტაიმი უფრო საინტერესოდ, მწვავე შეტევებით წარიმართა. თუმცა, მეტოქეთა მეკარეების თავგანწირული თამაშის წყალობით, ანგარიში მხოლოდ მატჩის მიწურულს შეიცვალა. ყველაფერი იქითკენ მიდიოდა, რომ დამატებითი ტაიმები და შესაძლოა პენალტების სერიაც მოსალოდნელი იყო. თუმცა, თამაშის დამთავრებამდე ნახევარი წუთით ადრე, ვახტანგ ჯვარაშვილმა შორეული ძლიერი დარტყმითა და ეფექტური ცხრიანით (2:1), ნიუ ვიჟენ ჯორჯიანსმა ფინალური სერიის ზედიზედ მესამე მატჩი მოიგო.

ნიუ ვიჟენ ჯორჯიანსის ტრიუმფს, ოვაციები, ყიჟინა და მაღალ დონეზე ორგანიზებული დაჯილდოების ცერემონიალი მოჰყვა. დაჯილდოების შემდეგ, სხვადასხვა ნომინაციებში საუკეთესოები დაასახელეს. ფუტსალის უმთავრესი ლიგის რჩეულთა ჩამონათვალი ასეთია:

საუკეთესო მეკარე - ბექა ტყემალაძე (ნიუ ვიჟენ ჯორჯიანსი);

საუკეთესო მცველი - შოთა თოფურია (ნიუ ვიჟენ ჯორჯიანსი);

საუკეთესო თავდამსხმელი - გიორგი ჩიმაკაძე (თსუ);

საუკეთესო ბომბარდირი - გიორგი ჩიმაკაძე (თსუ) - 34 გოლი

სეზონის უნივერსალი - ნიკოლოზ კურტანიძე (პსპ)

საუკეთესო ფეხბურთელი - გიორგი ქურდაძე (ნიუ ვიჟენ ჯორჯიანსი);

საუკეთესო მწვრთნელი - ავთანდილ ასათიანი (ნიუ ვიჟენ ჯორჯიანსი).