ფუტსალის უმთავრეს ლიგაში ახალი სეზონი უხვგოლიანი ტურით გაიხსნა. სეზონი დიდი ჯახებით დაიწყო და ორი ლიდერი გამოიკვეთა.   დიდი ჯახები შემთხვევით არ გვიხსენებია და ამის დასტურად ორი ფრე, ოთხი გაცუდებული პენალტი, მეკარის მიერ გატანილი ორი გოლი და სხვა ფაქტორები გამოდგება. თუმცა, ამაზე ქვემოთ, მანამდე კი მონაწილეთა ცვლილებაზე ვთქვათ. გასული სეზონის პლეი აუტის მატჩებში, ილიაუნმა გორს სძლია და ლიგაში ადგილი შეინარჩუნა. ბოლოადგილოსანი ევროპის უნივერსიტეტი ავტომატურად დაქვეითდა და მის ნაცვლად, ფუტსალის მთავარ ლიგაში დებიუტანტი წალენჯიხა იასპარეზებს.

სეზონი მოქმედმა ჩემპიონებმა ილიაუნთან მატჩით გახსნეს, მაგრამ სეზონის პირველი გოლი სტუდენტების ანგარიშზეა. ილიაუნელთაგან რომან კუხიანიძემ მეშვიდე წუთზე გახსნა ანგარიში. ამას ნახევარ წუთში დავით ხეჩიკაშვილის საპასუხო გოლი მოჰყვა, 1:1. ჯორჯიანსელებმა თავიანთი სათამაშო უპირატესობა ანგარიშშიც მალე ასახეს. შესვენებამდე ნიკოლოზ გაბრიჩიძემ დუბლი მიითვალა, რასაც ვახტანგ კეკელიამ ერთი გოლიც მიამატა და ნიუ ვიჟენმა ტაიმი სოლიდური ფორით დაასრულა, 4:1. მეორე ტაიმიც ილიაუნელთა გოლით დაიწყო, კუხიანიძემ დუბლი მიითვალა, რასაც ჩემპიონებმა 5 გოლი მიაყოლეს, ილიაუნიდან ნიკა ჩალაძეც გოლით გამოირჩა და საბოლოდ ნიუ ვიჯენ ჯორჯიანსმა დიდი ანგარიშით 9:3 მოიგო. ჯორჯიანსელთაგან ხეჩიკაშვილმა ჰეთ თრიკი შეასრულა, კეკელიამ და გაბრიჩიძემ დუბლები გაიფორმეს. ვახტანგ ჯვარაშვილმა ერთი გაიტანა, ერთი ავტოგოლი კი გურამ ბალხამიშვილს ერგო.

ქუთაისმა სტარტზევე დააფიქსირა, რომ მრისხანე მეტოქეებს არაფერს დაუთმობს. კსუ-სთან თბილისურ ჯახში სწორედ იმერლები დაწინაურდნენ, ანგარიში ირაკლი გვეტაძემ გახსნა. ნახევარ წუთში, კავკასიელთაგან საბა ტყეშელაშვილმა წონასწორობა აღადგინა, 1:1. თუმცა, ტაიმის მიწურულს ირაკლი გვეტაძემ ქუთათურები დააწინაურა, 1:2. მეორე ნახევარში მეტი გოლი ვიხილეთ. ბაკურ გულუას ავტოგოლით სტუდენტებმა გაათანაბრეს, (2:2), 26-ე წუთზე კი ტყეშელაშვილმა კსუ წინ გაიყვანა, 3:2. ორიოდე წუთში გვეტაძემ 3:3 გახადა ანგარიში. 35-ე წუთზე ნიკა მანგოშვილმა სტუდენტები დააწინაურა (4:3), მაგრამ გიორგაძისა და გვეტაძის თითო გოლით ქუთაისი ისევ წინ გავიდა, 4:5. მატჩის ბოლოს ტყეშელაშვილმა კავკასიელებს ქულა გადაურჩინა, 5:5. ამ შეხვედრაში ირაკლი გვეტაძემ პოკერი შეასრულა და ბომბარდირთა რბოლას 4 გოლით სათავეში ჩაუდგა.

თსუ-სა და არმიას დაპირისპირებაში მეტოქეებმა ორი განსხვავებული ტაიმი გვიჩვენეს. შესვენებამდე ერთადერთი გოლი ვიხილეთ, თსუ-ელთაგან საბა მაჩიტიძემ მე-7 წუთზე  ანგარიში გახსნა. არმიელებმა ამას მეორე ტაიმის სტარტზე უპასუხეს - 21-ე წუთზე კახაბერ მაისაიამ ანგარიში გაათანაბრა, 1:1. ლადო ბურდულის გუნდის ზეწოლის შედეგად, 27-ე წუთისთვის სტუდენტებმა გაფრთხილებების ლიმიტი ამოწურეს. არმიამ ორჯერ მოიპოვა პენალტის, მაგრამ დაწინაურების ორივე შანსი ქარს გაატანა - გიორგი სილაგავას მიერ შესრულებული პენალტი თსუ-ს მეკარე თორნიკე დვალიშვილმა მოიგერია, თამაზ გოგსაძემ კი პენალტი კარს ააცილა. ამ ორ პენალტს შორის, სტუდენტების კაპიტანმა გიორგი ჩიმაკაძემ გაიტანა და სტუდენტები წინ გაიყვანა, 2:1. არმიელებს მხსნელად, მეკარე ვახტანგ ტერუნაშვილი მოევლინა, რომელმაც 38-ე წუთზე ანგარიში გაათანაბრა. ზუსტად წუთში, ჩიმაკაძემ დუბლი მიითვალა და სტუდენტები კვლავ წინ გაიყვანა, 3:2. მატჩის ბოლო წუთზე მეკარე ტერნაშვილმა თავურით კიდევ ერთხელ აღადგინა წონასწორობა და არმიელები მარცხისგან იხსნა, 3:3.

ლიგის დებიუტანტ წალენჯიხასთან ვიცე-ჩემპიონ პსპ-ს იოლი გასეირნება არ ჰქონია. ფარმაცევტებმა მხოლოდ მე-14 წუთზე შეძლეს დაწინაურება - ანგარიში ნუგზარ გოგაშვილმა გახსნა. მიღებულმა გოლმა წალენჯიხელები გაახელა და მათ მეტოქის კართან არაერთი მწვავე შეტევა განახორციელეს. გიგა დანელიას გუნდთან ბრძოლაში, მე-15 წუთისთვის პსპ-მ გაფრთხილებების ლიმიტი ამოწურა სტუმრებს წონასწორობის აღდგენაც შეეძლოთ, მაგრამ მე-18 წუთზე წალენჯიხელი ლუკა ჯოლოხავას მიერ დარტყმული პენალტისას, ბურთს პსპ-ს მეკარე ნიკოლოზ ფხაკაძემ გადაეფარა. ტაიმის დასრულებამდე ნახევარი წუთით ადრე, ფარმაცევტებს მიეცათ ანგარიშის გაზრდის შესაძლებლომა, მაგრამ ნიკოლოზ კოპლატაძის პენალტი, სტუმართა მეკარე ლაშა გორდულავამ მოიგერია. კოპლატაძემ მორიგი შანსი მაინც გამოიყენა და მის მიერ 27-ე წუთზე გატანილი გოლით პსპ-მ 2:0 მოიგო.

სასტარტო ტურის შემდეგ ცხრილს ორი ლიდერი ჰყავს, მოქმედი ჩემპიონი ნიუ ვიჟენ ჯორჯიანსი და ვიცე-ჩემპიონი პსპ. მომდევნო ტურში, რომელიც 18-19 ოქტომბერს გაიმართება, ერთმანეთს სწორედ ეს ორი ლიდერი დაუპირისპირდება.