ფუტსალის ლიგის მეორე ტურმა ორი ლიდერიდან ერთი დატოვა პირველ ადგილზე და ეს პატივი მოქმედ ჩემპიონ ნიუ ვიჟენ ჯორჯიანსს, ნიკოლოზ გაბრიჩიძის ჰეთ თრიკის წყალობით, დამსახურებულად ერგო,. ჯორჯიანსელებს ორი უახლოესი მდევარი ჰყავს და ორივე სტუდენტური გუნდი - დებიუტანტ წალენჯიხასთან ბენეფისის ავტორი კსუ და ქუთაისის მძლეველი თსუ. ასეთია მეორე ტურის მოკლე რეზიუმე, რომელიც ილიაუნისა და არმიის დაპირისპირების გადადების გამო, არასრული გახლდათ.

სასტარტოს მსგავსად, მეორე ტურშიც პირველი შეხვედრა უხვგოლიანი გამოდგა. დებიუტანტ წალენჯიხასთან კავკასიელებს ანგარიშის გახსნა დაუგვიანდათ. თუმცა, ალექსანდრე ორაგველიძემ მე-7 წითზე გატანილ ბურთს, 4 წუთში მეორეც დაამატა. სტუდენტები ამას არ დასჯერდნენ და წუთიანი შუალედებით, ჯერ საბა ტყეშელაშვილმა, მერე კი ნოდარ ქურცაძემ მონაგარს თითო გოლი მიამატეს და სხვაობა სოლიდური გახადეს, 0:4. ამან წალენჯიხელები გაახელა და ორწუთიან შუალედში გურამ ჩალიგავამ და გიორგი უბილავამ, თითო ბურთის გაქვითვით, სხვაობა ორამდე შეამცირს, 2:4. მეორე ნახევარი კსუ-ს სრული უპირატესობით წარიმართა და მათი ბენეფისიც შედგა - სტუდენტებმა 7 უპასუხო ბურთი გაიტანეს. საბოლოდ, ალექსანდრე ორაგველიძემ, საბა ტყეშელაშვილმა, ლუკა ფარცვანიამ და გიორგი ხაბალაევმა დუბლები მიითვალეს. ნოდარ ქურცაძემ, თამაზ ვახანიამ და კახა მაღლაკელიძემ თითო გოლი დაამატეს და კავკასიელებმა 2:11 იმარჯვეს.

ცხრილის ორი ლიდერის, ნიუ ვიჟენ ჯორჯიანსისა და პსპ-ს დაპირისპირება, რაღა თქმა უნდა, ტურის ცენტრალური მატჩი გახლდათ. მოქმედმა ჩემპიიონებმა ეს გამოცდა ჩინებულად ჩააბარეს და დამსახურებული გამარჯვებით ცხრილის ერთპიროვნული ლიდერები გახდნენ. ჯორჯიანსელთა გამარჯვებაში ლომის წვლილი ნიკოლოზ გაბრიჩიძემ დაიდო, რომელმაც ამ შეხვედრაში ანგარიში გახსნა და დასკვნითი გოლით „დახურა“ კიდეც. ავთანდილ ასათიანის ბიჭები, მეორე წუთზე, გაბრიჩიძის გოლით დაწინაურდნენ. ნიუ ვიჟენელები ამას არ დასჯერდნენ, მაგრამ სხვაობის გაზრდა დაუგვიანდათ, რაც პსპ-ს მეკარე ნიკოლოზ ფხაკაძის დამსახურება იყო. მე-13 წუთზე ვახტანგ კეკელიამ ანგარიში მაინც გაზარდა, 2:0. ორიოდე წუთში, მაჰმადამინოვის გამჭოლი პასი, დავით ხეჩიკაშვილმა გოლად აქცია, 3:0. კიდევ სამ წუთში ვახტანგ ჯვარაშვილმა მახვილი კუთხიდან ზუსტად გაისროლა და სხვაობა სოლიდური გახადა, 4:0. ფარმაცევტებიც არ იყვნენ უქმად და შესვენებამდე 18 წამით ადრე მიხეილ თევზაძემ ერთი ბურთი გაქვითა, 4:1. მეორე ტაიმი პსპ-მ უკეთ დაიწყო და 26-ე წუთზე მალხაზ მურცხვალაძემ ანგარიშში სხვაობას შეამცირა, 4:2. ფარმაცევტებმა ანგარიშის გათანაბრებაზე იწყეს ზრუნვა და იერიშები გააგრძელეს, მაგრამ ჯორჯიანსელებმა გაუძლეს, მერე თამაშის სადავეებიც დაიბრუნეს და 34-ე წუთზე ბრაზილიელი მატეუს და სილვას სოლო რეიდი გაბრიჩიძემ ქუსლით გატანილი ეფექტური გოლით დააგვირგვინა, 5:2. პსპ არ დანებდა, 37-ე წუთზე ნუგზარ გოგაშვილმა ბურთი მეკარეს თავზე გადაავლო და სხვაობა ორამდე შეამცირა, 5:3. ფარმაცევტებს სამ წუთზე მეტი ჰქონდათ თამაშის გადასარჩენად, მაგრამ ეს დრო ჯორჯიანსელებმა გამოიყენეს. მატჩის ბოლოსწინა წუთზე, გაბრიჩიძემ მახვილი კუთხიდან გატანით ჰეთ ტრიკი მიითვალა და ბომბარდირთა ცხრილში, კავკასიელთა საბა ტყეშელაშვილის მსგავსად 5 გოლი მოაგროვა.

ქუთაისი ადგილობრივ სპორტის სასახლეში თსუ-ს დაუხვდა, თბილისელები გიორგი ჩიმაკაძისა და ნოდარ ქურცაძის გოლებით დაწინაურდნენ, 0:2. ტაიმის ბოლოს კი ზურაბ ლუკავამ გაზარდა სხვაობა, 0:3. მეორე ტაიმის სტარტზე, 23-ე წუთზე გიორგი ჩიმაკაძემ მეორე გოლიც გაიტანა, 0:4. ქუთაისელებმა მხოლოდ ერთი ბურთის გაქვითვა შეძლეს -გიორგი გიორგაძემ პრესტიჟის გოლი გაიტანა. თსუ-მ 1:4 იმარჯვა და კსუ-სთან ერთად ცხრილში მეორე-მესამე ადგილს იკავებს.