ილიაუნისა და პსპ-ს შემდეგ, მოქმედმა ჩემპიონმა  კიდევ ერთ ფავორიტს სძლია. ნიუ ვიჟენ ჯორჯიანსმა ერთგზის ჩემპიონ კსუ-ს სოლიდური ანგარიში მოუგო და ცხრილში დააქვეითა. ჯორჯიანსს ქულათა მაქსიმუმი აქვს და ერთადერთი უდანაკარგო გუნდია. მეორეზე დაუმარცხებელი თსუ-ა, რომელმაც დებიუტანტთან იმარჯვა. ფარმაცევტებმა ილიაუნი დაჯაბნეს, არმიელებმა კი ქუთაისს აჯობეს. ასეთია ფუტსალის მთავარი ლიგის მესამე ტურის მოკლე რეზიუმი. უფრო ვრცლად კი, სჯობს თანმიმდევრობას მივყვეთ.

ილიაუნთან შეხვედრაში, პსპ-დან ლევან სვანიძემ მე-3 წუთზე გახსნა ანგარიში. სტუდენტებმა ფარმაცევტებს მხოლოდ სტარტზე გაუწიეს წინააღმდეგობა. ზუსტად წუთში გიორგი დიაკვნიშვილმა წონასწორობა აღადგინა, 1:1. თუმცა, ბესიკ არველაძის ბიჭებმა თამაშის სადავეები არ დათმეს და ეს ტაბლოზეც ჯეროვნად ასახეს - მალხაზ შამილაძის, ნიკოლოზ კოპლატაძისა და გიორგი აფციაურის თითო გოლით, პსპ შესვენებაზე გვარიანი ფორით გავიდა, 4:1. მეორე ტაიმის მეორე ნახევარში, გიორგი გაზდელიანმა და ნუგზარ გოგაშვილმა მონაგარს თითო გოლი დაუმატეს და ფარმაცევტებმა 6:1 მოიგეს.

კსუ-სა და ნიუ ვიჟენ ჯორჯიანსის დაპირისპირება ტურის ცენტრალურ მატჩად იყო მიჩნეული და არც თუ უსაფუძვლოდ. ანგარიში კავკასიელებმა გახსნეს - მე-4 წუთზე ალექსანდრე ორაგველიძემ სტუდენტები დააწინაურა. ჯორჯიანსელები ამან გაახელა, მათ იერიშებს სიზუსტე შემატეს და ეს ანგარიშშიც ასახეს. მე-10 წუთზე შოთა თოფურიამ ნიკოლოზ გაბრიჩიძის პასი დააფასა და ანგარიში გაათანაბრა, 1:1. ნახევარ წუთში ნიუ ვიჟენელთა ყირგიზმა ლეგიონერმა შოხრუხ შახმადინოვმა, კუთხურიდან მოწოდებული ბურთი შეუჩერებლად კარში გადაგზავნა და ქართული კარიერის პირველი გოლით ჯორჯიანსელები დააწინაურა, 1:2. ხუთ წუთში ვახტანგ ჯვარაშვილი ერთი მეტოქეს გასცდა, რბილი დარტყმით ბურთი მეკარეს თავზე გადაავლო და ფორა გააორმაგა, 1:3. სტუდენტებს შეეძლოთ შესვენებამდე ანგარიში შეემცირებინათ, მაგრამ ნიკა მანგოშვილის დარტყმული პენალტი მეკარე ალექსანდრე ჯამბურიას ნადავლი გახდა. მანგოშვილმა თავისი გოლი მაინც გაიტანა - 22-ე წუთზე ბექა ბექაურის გადაცემით მეტოქეს დაასწრო და ანგარიში მინიმუმამდე შეამცირა, 2:3. კავკასიელებმა შეტევები გააგრძელეს, ჯორჯიანსელებმა კარის უსაფრთხოებაზე გააკეთეს აქცენტი, მაგრამ ყრუ დაცვაში არ ჩამჯდარან და კონტრიერიშებით გვარიანად აწუხებდნენ სტუდენტებს. ამან გაამართლა კიდევ და 31-ე წუთზე ჯვარაშვილმა შორეული გასროლით ორბურთიანი ფორა აღადგინა, 2:4. მალევე დავით ხეჩიკაშვილმა სხვაობა გაზარდა, 2:5. კსუ ვა-ბანკზე წავიდა და მეკარიანად შეუტია. ამით ჩინებულად ისარგებლეს ჯორჯიანსელებმა ჯერ, ჯვარაშვილმა ჰეთ თრიკი მიითვალა, მერე კი ვახტანგ კეკელიამ გაიტანა. ნიუ ვიჟენ ჯორჯიანსმა სოლიდურად, 2:7 მოიგო, ცხრილს კვლავ ერთპიროვნულად ლიდერობს და მდევარს 2 ქულით უსწრებს.

ლიგის დებიუტანტ წალენჯიხასთან თსუ სტარტზევე დაწინაურდა - მე-3 წუთზე ჯანიკო გიორგაიამ, ზურაბ ლუკავას გამჭოლი პასი დააფასა და ანგარიში გახსნა, 1:0. სტუდენტები ამას არ დასჯერდნენ და ფორის შექმნაზე იწყეს ზრუნვა, მაგრამ წალენჯიხელთა კიპერმა ნიკა გულორდავამ არაერთხელ იხსნა კარი. თუმცა, მე-16 წუთზე გეგა კოშაძემ ანგარიში მაინც გაზარდა, 2:0. სტუმრებს ხელი არ ჩაუქნევიათ, ტაიმის ბოლო წუთზე, თბილისელთა მორიგი იერიში სტუმართაგან ლუკა ჯოლოხავამ კონტრშეტევად აქცია და ანგარიში მინიმუმამდე შეამცირა, 2:1. წალენჯიხამ მეორე ტაიმი აქტიურად დაიწყო და სტუდენტები გვარიანადაც ანერვიულა, მაგრამ მათ მხსნელად კაპიტანი მოევლინათ - 25-ე წუთზე გიორგი ჩიმაკაძემ ფსიქოლოგიურად გარდამტეხი გოლით თსუ-ს ფორა შეუქმნა, 3:1. თუმცა, მეგრელებმა მასპინძლებს სიმშვიდე მაინც დაურღვიეს. სტუმართა მეკარე ნიკა გულორდავამ კიდევ არაერთი რთული ბურთის მოგერიებით, თანაგუნდელები შეაგულიანა და 30-ე წუთზე ნიკა ღვინჯილიამ, სხვაობა მინიმუმამდე შეამცირა, 3:2. თუმცა, სტუდენტებმა თავისი მაინც გაიტანეს - ოთხ წუთში ზურაბ ლუკავამ საბოლოო ანგარიში დააფიქსირა და 7 ქულით თსუ-ს მეორე ადგილი შეუნარჩუნა.

არმიელებმა ქუთაისთან მატჩის სტარტზევე მოიპოვეს უპირატესობა, მაგრამ იმერლებმა სრული 16 წუთის განმავლობაში კარის მშრალად შენახვა შეძლეს. ლადო ბურდულის ბიჭებმა, ტაიმის მიწურულს მაინც გატეხეს მეტოქე და მე-17 წუთზე თამაზ გოგსაძის გამჭოლი პასი, გიგა ბერაიამ გოლად აქცია, 1:0. ორიოდე წუთში ოთარ ბერეჩიკიძემ სხვაობა გააორმაგა. მეორე ნახევრის სტარტზე ვანო ბექაურმა სტუმართა იერიში შეაჩერა, თავად წამოიწყო შეტევა და სხვაობა გაზარდა, 3:0. ამას იმერელთა შტურმი მოჰყვა, მაგრამ სტუმრებმა გატანა ვერ შეძლეს და 26-ე წუთზე გიორგი სილაგავამ ქუთათურები გოლით დასაჯა, 4:0. მატჩის ბოლოსწინა წუთზე შმაგი ჭოხონელიძემ ტაბლოზე საბოლოო შედეგი დააფიქსირა, 5:0.