ფუტსალის უმთავრესი ლიგის მეოთხე ტურის გამორჩეული მატჩი, პსპ-კსუ-ს დაპირისპირება გადაიდო, მაგრამ დარჩენილ სამ შეხვედრას დრამატიზმი არ აკლდა. ამ ტურში, სტუდენტების პირველი წაგება და პირველი მოგება ვიხილეთ - თსუ-მ პირველად წააგო, ილიაუნმა პირველი გამარჯვება იზეიმა... არმია კვლავ წაუგებელია, მოქმედმა ჩემპიონმა ისევ ქულათა მაქსიმუმი მოიპოვა, დებიუტანტ წალენჯიხას სიურპრიზის ავტორობამდე ცოტა დააკლდა - ასეთია ამ ტურის მოკლე რეზიუმე. თუმცა, სჯობს თანმიმდევრობას მივყვეთ.

ტური ცენტრალური მატჩით გაიხსნა, რომელშიც პირველ და მეორე ადგილზე მყოფი გუნდები შეეჭიდნენ ერთმანეთს. ჯორჯიანსისა და თსუ-ს დაპირისპირების საწყის 5 წუთში, ორივე კართან არაერთი ხიფათი შეიქმნა, მაგრამ ანგარიში მხოლოდ მე-6 წუთზე გაიხსნა. ბრაზილიელმა მატეუს და სილვამ (იგივე რონინიომ) გიორგი თოლორდავას უპასა, რომელმაც ნიუ ვიჟენი დააწინაურა, 1:0. ჩემპიონებმა შეტევები გააგრძელეს, სტუდენტებმაც არაერთხელ აგრძნობინეს მეტოქეს, რომ ამ სეზონში არსებული წაუგებელი სერიის გაგრძელება უნდოდათ. თუმცა, მეტოქეთა მცდელობების მიუხედავად, 11 წუთის განმავლობაში ანგარიში არ შეცვლილა. მე-17 წუთზე ნიკოლოზ გაბრიჩიძემ, ზუსტი და ძლიერი საჯარიმო დარტყმით ჯორჯიანსელთა ფორა გააორმაგა, 2:0. მეორე ტაიმიც ორმხრივი შეტევებით წარიმართა. 26-ე წუთზე საბა მაჩიტიძემ ორ მეტოქეს ბურთი აართვა, მესამეს გასცდა და ანგარიშში სხვაობა მინიმუმამდე შეამცირა, 2:1. სტუდენტები წონასწორობის აღდგენას შეეცადნენ და ბოლო 10 წუთი მეკარიანად შეუტიეს. 33-ე წუთზე, რონინიომ აუტიდან ბურთი ვახტანგ ჯვარაშვილს გადააწოდა, რომელმაც ორბურთიანი ფორა აღადგინა, 3:1. თსუ-ს მატჩის გადასარჩენად 7 წუთი ჰქონდა, მაგრამ შედეგი აღარ შეცვლილა. თსუ-მ ამ სეზონში პირველად წააგო, მაგრამ 7 ქულით, არმიასთან ერთად, მეორე-მესამე ადგილს იყოფს.

უქულოდ მყოფი ილიაუნი ქუთაისი დაუხვდა, რომელსაც განვლილ სამ ტურში მხოლოდ ერთი ქულა ჰქონდა. სტუდენტებმა მასპინძლის როლი სტარტზევე მოირგეს და უპირატესობას დაეუფლნენ, მაგრამ იმერლებმა თამაში გაათანაბრეს. თუმცა, ტაიმის პირველი ნახევარი უგოლოდ მიილია. ქუთათურებმა მეტოქეს უპირატესობა ხელიდან გამოსტაცეს და ეს ანგარიშშიც ასახეს. მე-14 წუთზე სტუმართა კაპიტანმა ბაკურ გულუამ ანგარიში გახსნა, 0:1. ამან ილიაუნი გაახელა და ორიოდე წუთში სტუდენტებმა წინ გასვლაც კი შეძლეს. მე-16 წუთზე, ჯერ ნიკოლოზ ქართველიშვილმა აღადგინა წონასწორობა და ოციოდე წამში ლაშა კურტანიძემ ილიაუნი დააწინაურა. სტუდენტებმა მეორე ტაიმი აქტიურად დაიწყეს და 21-ე წუთზე გიორგი დიაკვნიშვილმა თავის გუნდს ორბურთიანი ფორა შუქმნა, 3:1. ოთხ წუთში დიაკვნიშვილმა გიორგი ქურხულს გაატანინა, 4:1. ქუთაისს მატჩის გადასარჩენად 15 წუთი ჰქონდა, მაგრამ ტაბლოზე დაფიქსირებული შედეგი აღარ შეცვლილა.

დებიუტანტ წალენჯიხასა და არმიას დაპირისპირება, ტურის ყველაზე უხვგოლიანი მატჩი აღმოჩნდა. საწყისი 15 წუთი მშრალად გაილია. დარჩენილ 5 წუთში, ლადო ბურდულის ბიჭებმა ოთხი უპასუხო გოლი გაიტანეს და ბენეფისი მოიწყვეს - შაკო ცირამუამ დუბლი მიითვალა, ოთარ ბერეჩიკიძემ და გიორგი სილაგავამ (10 მეტრიანი) თითო გოლი გაიტანეს, 0:4. მეორე ტაიმი წალენჯიხამ აქტიურად დაიწყო და უპირატესობასაც მალე დაეუფლა. თუმცა, ტაიმის ნახევარზე მეტი დრო მშრალი აღმოჩნდა. სტუმართა მონდომებამ მაინც გამოიღო შედეგი. 33-ე წუთზე ალექსანდრე ღვინჯილიამ კუთხე ჩაკეტა და ერთი ბურთი გაქვითა, 1:4. ზუსტად წუთში ლუკა ჯოლოხავამ დასწრებაზე იმარჯვა და 2:4. სტუმრებს მატჩის გადასარჩენად 6 წუთი ჰქონდათ, მაგრამ მხოლოდ ერთის გატანა შეძლეს. 38-ე წუთზე გურამ ჩალიგავამ საჯარიმო დარტყმა გოლად აქცია 3:4. არმიამ მეორე გამარჯვება იზეიმა და ცხრილში ზევით აინაცვლა. წალენჯიხა ისევ უქულოდაა, მაგრამ ამ გუდნმა დაამტკიცა, რომ სიურპრიზების ავტორობა შეუძლია.