ფუტსალის უმთავრესი ლიგაში სეზონი ახალ ფაზაში შევიდა. როგორც ჩანს, სენსაციები ამჯერადაც არ მოგვაკლდება. ამის დასტურად სეზონის რიგით მეორე სენსაცია გამოდგება, რომლის ავტორი ილიაუნი გახლავთ. დებიუტანტ წალენჯიხას შეეძლო პირველი მოგება ეზეიმა. პსპ-მ თამაში შემოაბრუნა და მორიგი 3 ქულა მიითვალა, ისევე როგორც უდანაკარგოდ მოასპარეზე ნიუ ვიჟენმა. თუმცა, სჯობს თანმიმდევრობას მივყვეთ...

ქუთაისმა ლიგის დებიუტანტ წალენჯიხას უმასპინძლა. იმერლებმა საკუთარ კედლებში აქტიურად კი დაიწყეს თამაში, მაგრამ მეგრელებმა მეტოქეს მალევე აგრძნობინეს, რომ რიონისპირა ქალაქში საექსკურსიოდ არ ჩასულან. ორივე კართან არაერთი ხიფათი შეიქმნა, მაგრამ ტაბლოზე არაფერი შეცვლილა. ტაიმის ბოლოსკენ წალენჯიხა გააქტიურდა და  ქუთაისელებმა შესვენებამდე 5 წუთით ადრე გაფრთხილებების ლიმიტი ამოწურეს. მე-18 წუთზე სტუმრებმა პენალტი დაიმსახურეს, მაგრამ გიორგი უბილავამ დაწინაურების შანსი ქარს გაატანა - ბურთი კარს გადააცილა. მეორე ტაიმი გარდამავალი უპირატესობით გაილია, მაგრამ ვერცერთმა გუნდმა ბურთის გატანა ვერ შეძლო და სეზონის პირველი უგოლო ფრეც ასე მივიღეთ.

ტურის მეორე დღე სენსაციით გაიხსნა. კსუ-სა და ილიაუნს შორის გასულ სეზონში გამართული 9 მატჩიდან 7 კავკასიელემა მოიგეს, ერთი ფრედ დასრულდა და ილიაუნმა კსუ-ს აქამდე მხოლოდ ერთხელ, ორი წლის წინ მოუგო, ისიც 5:2. თავის დროზე ილიაუნელთა ის გამარჯვებაც სენსაცია იყო, ამჯერად კი ამ სტუდენტურ დერბიში ილიაუნმა ერთგზის ჩემპიონ კსუ-ს, მშრალად და სოლიდურად, 0:5 მოუგო. გიორგი დიაკვნიშვილმა მე-2 წუთზე გახსნა ანგარიში. ნახევარ წუთში ბორის ესებუამ სხვაობა გააორმაგა. ათ წუთში კი ლაშა კურტანიძემ ფორა სამამდე გაზარდა, 3:0. კავკასიელები კი გაცხარდნენ, მაგრამ ამას ვერც შესვენებამდე და მეორე ტაიმშიც გოლი ვერ დაუპირისპირეს. 32-ე წუთზე დიაკვნიშვილმა მეორე გაიტანა, 4:0. სამიოდე წუთში მას კურტანიძემ მიბაძა და მანაც დუბლი გაიფორმა და საბოლოო ანგარიში დააფიქსირა, 0:5. ამ მოგებით ილიაუნმა მეტოქეს ადგილი გაუცვალა და მე-5 ადგილზე აღზევდა.

სატურნირო მდგომარეობის მიხედვით, თსუ-სა და პსპ-ს დაპირისპირებისადმი ინტერესი დიდი იყო და არც თუ უსაფუძვლოდ. მატჩი დრამატულად და საინტერესოდ, გარდამავალი უპირატესობით წარიმართა. მე-2 წუთზე ფარმაცევტების კონტრიერიში გიორგი ჩიმაკაძემ ჩაჭრა, მაგრამ ბურთი საკუთარ კარში ჩაჭრა და პსპ წინ გავიდა, 0:1. მეტოქის დაწინაურებამ სტუდენტები გაახელა, მაგრამ ფარმაცევტებიც არ იყვნენ უქმად. მე-5 წუთზე მალხაზ შამილაძის გრძელი გადაცემა გიორგი ექსეულიძემ გოლად აქცია და ფორა გააორმაგა, 0:2. ორიოდე წუთში გეგა კოშაძემ მახვილი კუთხიდან დარტყმით ანგარიშში სხვაობა მინიმუმამდე შეამცირა, 1:2. ნახევარ წუთში საბა მაჩიტიძემ წონასწორობა აღადგინა, 2:2. სტუდენტებმა მეტოქეე ზეწოლა გააძლიერეს და მოგვიანებით შეტევებში მეკარეც ჩართეს. ამან შედეგი გამოიღო კიდეც, მე-15 წუთზე გიორგი ჩიმაკაძემ სტუდენტები წინ გაიყვანა, 3:2. ახლა უკვე პსპ შეეცადა თამაშის სათავისოდ შემობრუნებას და ეს მეორე ტაიმში მოახერხა კიდეც. ფარმაცევტებმა 4-წუთიან მონაკვეთში სამი ბურთი გაიტანეს - 29-ე წუთზე ლევან სვანიძემ გაათანაბრა ანგარიში (3:3), წუთში ნიკოლოზ კურტანიძემ პსპ წინ გაიყვანა (3:4), წუთნახევარში კი კურტანიძემ დუბლი მიითვალა და ფარმაცევტებმა 3:5 იმარჯვეს. ამ მოგებით, ბესიკ არველაძის ბიჭები ცხრილში საგრძნობად დაწინაურდნენ და მეორე ადგილზე აინაცვლეს.

წინა მატჩის მსგავსად, ნიუ ვიჟენ ჯორჯიანსისა და არმიას დაპირისპირებაც სანახაობრივად მდიდარი გახლდათ. სწრაფ ტემპში დაწყებული თამაშის სტარტზეც შემთხვევითი ავტოგოლი გავიდა. ვახტანგ ჯვარაშვილის გამჭოლი პასი, თამაზ გოგსაძემ ჩაჭრა და არმიელთა კარის ბადეში აღმოჩნდა. 4 წუთში ყირგიზეთის ნაკრების ფორვარდმა შოხრუნ შახმადინოვმა შორეულ, ძლიერ დარტყმით სხვაობა გააორმაგა, 0:2. არმიელები თამაშში დაბრუნებაც შეეცადნენ და ეს შეძლეს კიდეც. ლადო ბურდულის ბიჭებმა ჯერ თამაში გაათანაბრეს, მერე კი უპირატესობასაც დაეუფლნენ და მე-14 წუთზე ბაკურ ნანეიშვილის პასი ოთარ ბერეჩიკიძემ გოლად აქცია, 1:2. ტაიმის მიწურულს შაკო ცირამუას ჩინებული გადაცემით ბერეჩიკიძემ დუბლი მიითვალა და ანგარიში გაათანაბრა, 2:2. მეორე ტაიმიც ორმხრივ შეტევებშიც გაილია. არმიელთა მეკარე ვახტანგ ტერუნაშვილმა არაერთ ეპიზოდში გადაარჩინა გუნდი. 28-ე წუთზე რონინიოს დარტყმისას ბურთი რიკოშეტებით კარისკენ გაძვრა და გიორგი თოლორდავამ ჯორჯიანსელები წინ გაიყვანა, 3:4. ოთხ წუთში ნიუ ვიჟენმა მეტოქის იერიში ჩაჭრა და ვახტანგ კეკელიამ თავურით გარდამტეხი ბურთი გაიტანა, 2:4. არმიელებს 8 წუთი ჰქონდათ მატჩის გადასარჩენად, მაგრამ ეს დრო ავთანდილ ასათიანის ბიჭებმა მეტად გამოიყენეს. ბოლო წუთებში არმია ვა-ბანკზე წავიდა და მეკარე ტერუნაშვილის თანხლებით შეუტია. მეტოქის დაუცველი კარით, ჯორჯიანსელებმა ჩინებულად ისარგებლეს და 38-ე წუთზე ლაშა სიგუნავამ სხვაობა სამამდე გაზარდა, 2:5. არმიამ ჯარიმების ლიმიტი ამოწურა და ბოლო წუთზე დანიშნული 10-მეტრიანი ვახტანგ კეკელიამ გოლა აქცია, 2:6.