ფუტსალის უმთავრეს ლიგის ბოლოსწინა ტურში, მესამეობისთვის ბრძოლამ კულმინაციას მიაღწია. გასული ტურის შემდეგ, რეგულარულ სეზონში მესამე ადგილის დაკავებისა და შესაბამისად, ფლეი ოფში, ილიაუნთან მეტოქეობის ყველაზე უკეთესი შანსი კსუ-ს ჰქონდა. მე-19 ტურმა ყველაფერი რადიკალურად შეცვალა - კავკასიელებს მდევრებმა გაუსწრეს, არმიას და თსუ-ს მესამეზე გასვლის რეალური შანსი აქვთ. უშანსოდ არც კსუ-ა, მაგრამ მხოლოდ თავისი გამარჯვება არ ჰყოფნის თსუ-ს ვერმოგებაც სჭირდება. მოკლედ, მეექვსეზე მყოფი ილიაუნი, ფლეი ოფში მესამეადგილოსან მეტოქეს ელის. ვნახოთ ვის ერგება ილიაუნი... მეორე წყვილსაც, რომელსაც მეოთხე-მეხუთეზე გასული გუნდები შექმნიან, ბოლო ტური გაარკვევს. მანამდე კი მე-20 ტური მიმოვიხილოთ...

წალენჯიხამ ფლეი აუტში მოხვედრა გასულ ტურში გაინაღდა, მაგრამ ბოლოსწინა ტურშიც ბოლომდე იბრძოლა მოსაგებად. მეგრელებმა, მეექვსე ტურში მარცხის მერე, ფრეზე დაითანხმეს სტუდენტები და ილიაუნთა გამარჯვებას კიდე ერთხელ შეეცადნენ, მაგრამ... მეორე წუთზე დასავლელები, ვაჟა კვარაცხელიამ სწრაფი გოლით დააწინაურა, 0:1. თუმცა, ორიოდე წუთში რომან კუხიანიძემ ანგარიში გაათანაბრა, 1:1. მეგრელემა ბრძოლა გააგრძელეს, მე-8 წუთზე კვარაცხელიამ დუბლი შეასრულა და წალენჯიხა ისევ წინ გაიყვანა, 1:2. მეტოქეს სტუდენტები ვალში არ დარჩნენ და ტაიმის ბოლოს გიორგი ქურხულმა წონასწორობა აღადგინა, 2:2. მეგრელებმა უმალ უპასუხეს და ვაჟა ლუკავამ წალენჯიხა გაახარა, 2:3. მეორე ტაიმმა ილიაუნის კარნახით ჩაირა. ომარ ასაშვილმა სტარტზევე აღადგინა წონასწორობა, 3:3. ამას ბადრი კალანდაძემ დუბლი მიაყოლა, 5:3. ბოლოს კი კუხიანიძემაც მეორედ გაიტანა და ილიაუნმა 6:3 იმარჯვა.

ორი ფრის შემდეგ, ნიუ ვიჟენ ჯორჯიანსმა ქუთაისთან ტრიუმფი მოიწყო. ავთანდილ ასათიანის ბიჭებმა იმერლებს თითო ტაიმში 4-4 გოლი გაუტანეს და 8:1 მოიგეს. ვახტანგ ჯვარაშვილმა ჰეთ თრიკი შეასრულა და 27 გოლით ბომბარდირთა ცხრილში მიუწდომელი შეიქმნა. დუბლი მიითვალა ვახტანგ კეკელიამ, რომელიც ოთარ ბერეჩიკიძესთან ერთად (17-17 გოლით), ბომბარდირებში მესამე-მეოთხე ადგილზეა. ნიკოლოზ გაბრიჩიძემ, ნუკრი ჭუმბურიძემ და ლაშა სიგუნავამ თითო გოლი გაიტანეს. ქუთაისელთაგან პრესტიჟის გოლი ირაკლი გვეტაძის ანგარიშზეა, რომელიც 21 გატანილი ბურთით ბომბარდირებში მეორე საფეხურზეა.

მესამე ადგილისთვის ბრძოლაში არმიელებს პსპ-სთან გამარჯვება სჭირდებოდათ. ეს ძალზე რთული ამოცანა იყო, რადგან აქამდე ფარმაცევტებმა არმიას 7 მატჩი მოუგეს და მხოლოდ ერთხელ წააგეს. ლადო ბურდულის ბიჭებმა კვლავ გამარჯვება ჩაიფიქრეს და საბოლოოდ ეს შეძლეს კიდეც. ამ დაძაბული მატჩის პირველი ნახევარი გარდამავალი უპირატესობით, მაგრამ უგოლოდ გაილია. ფარმაცევტებმა მეორე ტაიმიც აქტიურად დაიწყეს და მათი მხრიდან მეტოქის კარში მეათე დარტყმა შედეგიანი აღმოჩნდა. 29-ე წუთზე გიორგი აფციაურის პასით, გიორგი ექსეულიძემ პსპ დააწინაურა, 1:0.  ფარმაცევტები ამას არ დასჯერდნენ და ხუთეულით შეუტიეს. ზუსტად წუთში, არმიელებს მხსნელად მეკარე ვახტანგ ტერუნაშვილი მოევლინა, რომელმაც მოწინააღმდეგის დარტყმული ბურთი აიღო და საკუთარი კარიდან ზუსტი დარყმით, ბურთი ცარიელ კარში გადაგზავნა. ტერუნაშვილმა სეზონში მეექვსე გოლით, ანგარიში გაათანაბრა, 1:1. ამ გოლმა არმიელებს დიდი სტიმული მისცა. მათ მეტოქეზე ზეწოლა გააძლიერეს და 36-ე წუთზე ბაკურ ნანეიშვილის გამჭოლი პასი, ლაშა ფოფხაძე გოლად აქცია და არმია წინ გაიყვანა 1:2. არმიელებმა იერიშები გააგრძელეს და 37-ე წუთზე ნანეიშვილმა მეორე გოლიც გაიტანა. არმიამ 1:3 მოიგო და მესამე ადგილთან ყველაზე ახლოსაა.

რეგულარულ სეზონში კსუ-მ თსუ-ს 6 მატჩი მოუგო, ორი წააგო, სამი თამაში ფრედ დასრულდა. მესამე ადგილისთვის ბრძოლაში, ორივე გუნდს მოგება ესაჭიროებოდა, რაც ორივესთვის დამატებითი მოტივაცია გახლდათ. ტურის ცენტალური მატჩის საკადრისად, თამაშმა დაძაბულ ბრძოლაში, გარდამავალი უპირატესობით ჩაიარა. პირველ ტაიმში ერთადერთი გოლი გავიდა - მე-12 წუთზე, შოთა ჭანუყვაძემ მეტოქის შეტევა ჩაჭრა, სამი მეტოქის გარემოცვიდან გიორგი ზუნტუროვს უპასა, რომელმაც რთული ვითარებიდან ანგარიში გახსნა, 1:0. მეორე ტაიმი თსუ-ს უპირატესობით დაიწყო, 22-ე წუთზე გეგა კოშაძემ ანგარიში გაათანაბრა, 1:1. სამ წუთში ჯანიკო გიორგაიამ თსუ-ელები წინ გაიყვანა, 1:2. ამას გიორგი ჩიმაკაძემ დუბლი შეაშველა და თსუ-ს უპირატესობა სოლიდური გახადა, 1:4. კავკასიელებმა თამაშის გადასარჩენად ბოლომდე იბრძოლეს, მაგრამ... ნიკა მანგოშვილისა და გიორგი ხაბალაევის თითო გოლი კსუ-სთვის საკმარისი არ აღმოჩნდა. თსუ-მ 3:4 მოიგო და ცხრილში მე-4 ადგილზეა.