ფუტსალის უმთავრესი ლიგის დასკვნითმა ტურმა ყველა კითხვას პასუხი გასცა და წინა ტურის ცხრილი უცვლელი დატოვა. არმია, რომელიც მესამე სეზონია ფუტსალის მთავარ ლიგაში ასპარეზობს, პირველად დაიკავა მესამე ადგილი და მე-6 საფეხურზე მყოფ ილიაუნს ფლეი ოფში დაუპირისპირდება. ფლეი ოფის მეორე წყვილი სტუდენტურია - თსუ და კსუ. ამ ორ წყვილს შორის გამარჯვებულებს, ფლეი ოფის ნახევარფინალში, რეგულარული სეზონის გამარჯვებული ნიუ ვიჟენ ჯორჯიანსი და მეორეადგილოსანი პსპ ელის... მანამდე კი ბოლო ტურის თამაშები მიმოვიხილოთ.

წინა ორი მატჩის მსგავსად, წალენჯიხის ძლევა, ნიუ ვიჟენ ჯორჯიანსს ამჯერადაც არ გასჭირვებია. ავთანდილ ასათიანის ბიჭებმა პირველში ხუთი, მეორე ტაიმში სამი გოლი გაიტანეს და საბოლოოდ 2:8 მოიგეს. ჯორჯიანსელთაგან, ვახტანგ ჯვარაშვილმა ჰეთ თრიკი შეასრულა, დავით ხეჩიკაშვილმა დუბლი მიითვალა. ვახტანგ კეკელიამ, შოთა თოფურიამ და ლაშა სიგუნავამ, თითო გოლი გაიტანეს. წალენჯიხელთაგან ვაჟა კვარაცხელიამ აქტივში ორი ბურთი ჩაიწერა. აღსანიშნავია ერთიც, რეგულარული სეზონის ბომბარდირი, 30 გატანილი გოლით ჯორჯიანსელთა მეგოლე ვახტანგ ჯვარაშვილი გახდა, რომელმაც წინა სეზონის ბომბარდირის რეკორდი ერთი ბურთით გააუმჯობესა. გასული სეზონის მთავარი მეგოლე გიორგი ჩიმაკაძე (21 გოლით), ამჯერად მესამე ადგილს დასჯერდა. წალენჯიხა მე-7 ადგილზე გავიდა და მთავარ ლიგაში ადგილის შესანარჩუნებლად, ქვედა ლიგის მეორეადგილოსანთან ფლეი აუტში მოუწევს შეერკინება.

დიდი ანგარიშით მოიგო კიდევ ერთმა ფავორიტმა, პსპ-მ ქუთაისს 3:9 სძლია. ფარმაცევტებიდან ნიკოლოზ კურტანიძემ 6 გოლის გატანით, (ფუტსალის ლიგაში ერთ მატჩში გატანილი 6 ბურთი სარეკორდო უნდა იყოს) ბენეფისი მოიწყო და ბომბარდირებში 19 გოლით მე-4 ადგილზე გავიდა. მეგოლეებში მეორე ადგილზე 22 გოლით, ქუთაისელთა რჩეული ირაკლი გვეტაძეა... პსპ-დან ქუთაისთან მატჩში, ლევან სარდანაშვილმა, მალხაზ მურცხვალაძემ და ლუკა ჯოლოხავამ თითო ბურთი გაიტანეს. იმერელთაგან თითო გოლით ირაკლი გვეტაძე და ნიკა ხაჭაპურიძე გამოირჩნენ და ერთხელაც ავტოგოლით იხეირეს. ბოლოადგილოსანი ქუთაისი, ახალ სეზონში ქვედა ლიგაში იასპარეზებს.

სტუდეტურ დერბიში თსუ-მ კიდევ ერთხელ სძლია ილიაუნს, თანაც წინა მატჩის მსგავსად, ამჯერადაც 4:2. თსუ-ელებმა თითო ტაიმში ორ-ორი გოლი გაიტანეს, ილიაუნეებმა კი თითო. თსუ-დან ნოდარ ქურცაძემ, გეგა კოშაძემ, გიორგი ჩიმაკაძემ კი ჯანიკო გიორგაიამ თითო გოლი იზეიმეს. ილიაუნიდან კი ნიკა გვაზავამ დუბლი შეასრულა. ამ მოგებით თსუ, კსუ-სთვის მიუწვდომელი შეიქმნა და რეგულარულ სეზონში მე-4 ადგილი დაიკავა.

თუ არმია კსუ-ს მოუგებდა, მაშინ ცხრილში თსუ-ს გაუსწრებდა და მესამე ადგილთან ერთად, ფლეი ოფში ილიაუნის მეტოქეობას გაინაღდებდა. ვლადიმერ ბურდულის ბიჭებმა ამ ამოცანას ჩინებულად გაართვეს თავი. არმიელებმა სოლიდური ანგარიშით გაიმარჯვეს, მაგრამ კავკასიური ბარიერი იოლი ნამდვილად არ ყოფილა და ანგარიში მხოლოდ მე-18 წუთზე გაიხსნა. არმიას მხსნელად მეკარე ვახტანგ ტერუნაშვილი მოევლინა, რომელმაც სეზონის მე-7 გოლი გაიტანა, 1:0. არმიელებს ანგარიშის გასაზრდელად 10 წუთი დასჭირდათ, 28-ე და 30-ე წუთებზე გიორგი სილაგავამ თითო ბურთი გაიტანა და ბურდულის გუნდმა გამარჯვებისკენ დიდი ნაბიჯი გადადგა, 3:0. არმიელებმა ეს არ იკმარეს - კახაბერ მაისაიამ, ლაშა ფოფხაძემ და დავით კოხრეიძემ თითო გოლი მიითვალეს, 6:0. მერე კავკასიელთა ჯერი დადგა, ნიკა ხარატიშვილი და ალექსანდრე ორაგველიძეც თითო გოლით გამოირჩნენ და არმიამ 6:2 მოიგო. კსუ, რომელიც 2021 წლის სეზონის ჩემპიონია, ამჯერად მე-5 ადგილს დასჯერდა და  მაღალი მიზნებისთვის ბრძოლას, ფლეი ოფში თსუ-სთან დაპირისპირებით გააგრძელებს.