ფუტსალის ფლეი ოფის ნახევარფინალში, არმია მიჯრით ორი მოგებით გავიდა. მეორე ნახევარფინალისტის ვინაობა კსუ-სა და თსუ-ს წყვილში უნდა გარკვეულიყო. პირველი შეხვედრაში კავკასიელებმა იმარჯვეს, მეორე მატჩში თსუ-ელებმა მეტოქის მოგება გააბათილეს და ჯერი მესამე თამაშზე მიდგა.

ეს სტუდენტური დერბიც დაძაბული და საინტერესო გამოდგა. ამაზე ისიც მეტყველებს, რომ ფლეი ოფისა და ფლეი აუტის განვლილი მატჩებისგან განსხვავებით, გამარჯვებულის გამოსავლენად ორი ძირითადი და ორიც დამატებითი ტაიმი საკმარისი არ აღმოჩნდა და პენატების პირველად გახდა საჭირო. თამაში გარდამავალი უპირატესობით წარიმართა, საგოლე მომენტი ორივე გუნდს არაერთი ჰქონდა, მაგრამ ოთხი ტაიმი ისე დასრულდა, რომ გოლის გატანა ვერცერთმა გუნდმა შეძლო. შესაბამისად, პენალტების სერია დაინიშნა, რომელიც თსუ-ს კაპიტანმა დაიწყო, გიორგი ჩიმაკაძემ ანგარიში გახსნა, 1:0. გიორგი ხაბალაევის დარტმული ბურთი თსუ-ს მეკარე თორნიკე დვალიშვილმა მოიგერია. კავკასიელთა კიპერი ბექა გოგსაძე ვიზავის არ ჩამორჩა და გეგა კოშაძის პენალტი მოიგერია. საბა ტყეშელაშვილმა გაიტანა და ანგარიში გაათანაბრა, 1:1. ფსიქოლოგიური უპირატესობას კსუ-ს მხარეს გადავიდა და მეკარე გოგსაძემ ნოდარ ქურცაძის დარტყმული პენალტი ფეხით მოიგერია და თავის გუნდს დაწინაურების შანსი მისცა. კავკასიელთაგან გიორგი ზუნტუროვმა ეს შანსი ჩინებულად გამოიყენა და კსუ წინ გაიყვანა, 1:2. თსუ-ელთაგან ზურაბ ლუკავას შეეძლო წონასწორობის აღდგენა, მაგრამ მისი დარტყმული ბურთი ხარიხამ აისხლიტა და ანგარიში აღარ შეცვლილა. შესაბამისად, კსუ-ს მოსაგებად ერთი პენალტის გატანაღა სჭირდებოდა. გადამწყვეტი პენალტი ლუკა ფარცვანიამ ჩინებულად შეასრულა, კსუ-მ 1:3 იმარჯვა  და ფლეი ოფის ნახევარფინალში მოქმედ ჩემპიონ ნიუ ვიჟენ ჯორჯიანს დაუპირისპირდება.