ჯერჯერობით, ყველაფერი იქითკენ მიდის, რომ ნიუ ვიჟენ ჯორჯიანსისა და პსპ-ს მონაწილეობით, შარშანდელი ფინალი, განმეორდეს. ნახევარფინალის პირველი შეხვედრები სწორედ ამ გუნდებმა მოიგეს, მაგრამ ფინალში გასვლისთვის ორი გამარჯვებაა საჭირო და ვნახოთ... მანამდე კი მიმოხილვა ფლეი აუტის მატჩით დავიწყოთ.

ფლეი აუტის პირველ თამაშში საქართველოს უნივერსიტეტმა წალენჯიხას 4:3 სძლია და ცხადია, წალენჯიხელები რევანშისთვის იბრძოლებდნენ. როგორც მოსალოდნელი იყო, ეს შეხვედრაც დაძაბულად და გარდამავალი უპირატესობით წარიმართა. სტუდენტები უმეტესად პირველ ნომრად თამაშობდნენ, მეგრელებმა კი კონტრშეტევებზე თამაში არჩიეს. ანგარიშის გახსნა გვარიანად დაგვიანდა. ტაიმის შუაწელიდან უნივერსიტეტელებმა მეკარიანად შეუტიეს, რითაც კარგად ისარგებლეს დასავლელებმა. მე-13 წუთზე სტუდენტების მორიგი შეტევა წალენჯიხელებმა ჩაჭრეს და ნიკა ხარშილავამ შორეული, ზუსტი დარტყმით ანგარიში გახსნა, 0:1. უნივერსიტეტელები არ გატყდნენ და უმალ უპასუხეს. მე-14 წუთზე გიორგი დიაკვნიშვილმა მახვილი კუთხიდან შედეგიანად გაისროლა და წონასწორობა აღადგინა, 1:1. თამაში გარდამავალი უპირატესობით გაგრძელდა, მაგრამ ანგარიში კარგა ხანს აღარ შეცვლილა. 36-ე წუთზე გელა მელანაშვილმა გრძელი გადაცემით ლაშა კაკაჩია მოძებნა, რომელიც ოსტატურად გასცდა მეურვეს და ეფექტური გოლით წალენჯიხას გამარჯვება მოუტანა, 1:2. მეგრელებმა საქართველოს უნივერსიტეტის მოგება გააბათილეს და ფლეი აუტის გამარჯვებულის ვინაობას მესამე შეხვედრა გადაწყვეტს, რომელიც 23 მაისს გაიმართება.

არმელები ფლეი ოფის ნახევარფინალში პირველად გავიდნენ. მათ საკმაო მონდომებით იწყეს თამაში და შედეგიც მალევე მოიმკეს. მე-4 წუთზე ლაშა ფოფხაძემ ფარმაცევტებს შორის შეუთანხმებლობით ისარგებლა, ინდივიდუალურ ოსტატობის ხარჯზე მეურვეები ჩამოიშორა და ზუსტი დარტყმით ანგარიში გახსნა. პირველი გოლის შემდეგ, თამაშმა უფრო დაძაბული და საინტერესო ხასიათი მიიღო. მით უეტეს, მეტოქეებმა ღია და ლაღი თამაში შესთავაზეს პუბლიკას. ორივე გუნდი შეტევაზე იყო ორიენტირებული და საგოლე მომენტიც ორივე კართან არაერთი შეიქმნა. ტაიმის ბოლოს პსპ-მ იძალა: მე-18 წუთზე ლევან სვანიძემ ფლანგზე რეიდი განახორციელა, გამჭოლი პასით გიორგი აფციაური მოძებნა, რომელმაც ანგარიში გაათანაბრა, 1:1. მეორე ტაიმიც სწრაფ ტემპში და სანახაობრივად წარიმართა, მაგრამ გოლები მხოლოდ ბოლო შვიდ წუთში გავიდა. არმიელებმა მეკარიანად შეუტიეს და ეს პსპ-მ გამოიყენა. მორიგი იერიშისას გიორგი ექსეულიძემ მოიპოვა ბურთი და საკუთარი საჯარიმოდან შორეული, ზუსტი დარტყმით დალაშქრა მეტოქის კარი, 1:2. არმიელებმა მეკარის თანხლებით გააგრძელეს შეტევები, მაგრამ ფარმაცევტებმა არა თუ კარის დაცვა, არამედ კიდევ ერთის გატანა შეძლეს - ნიკოლოზ კოპლატაძემ საბოლოო ანგარიში დააფიქსირა, 1:3. პსპ-მ ფინალისკენ დიდი ნაბიჯი გადადგა და საამისოდ მხოლოდ ერთი მოგება სჭირდება.

მეორე ნახევარფინალში, ფუტსალის ლიგის ორგზის ჩემპიონი ნიუ ვიჟენ ჯორჯიანსი და 2021 წლის სეზონის ჩემპიონი კსუ დაუპირისპირდნენ ერთმანეთს. საგულისხმოა ისიც, რომ კსუ როცა ჩემპიონი გახდა, ნახევარფინალში სწორედ ჯორჯიანსს სძლია. ეს და კიდევ არაერთი ფაქტი იმისი დასტურია, რომ მეტოქე გუნდებისგან ქომაგები კარგ სანახაობას ელოდნენ და ასე მოხდა. მატჩი, რომელიც დრამატული და უხვგოლიანი გამოდგა, სამმა ფეხბურთელმა დუბლი გაახერხა. თუმცა, სჯობს თანმიმდევრობას მივყვეთ... მე-6 წუთზე რონინიომ კუთხურიდან შოხრუნ მახმადამინოვს უპასა, რომელმაც ზუსტი დარტყმით ანგარიში გახსნა, 1:0. კავკასიელებმა მეტოქეს ნახევარ წუთში უპასუხეს - შოთა ჭანუყვაძემ საჯარიმო დარტყმით წონასწორობა აღადგინა, 1:1. წუთიც არ იყო გასული, რონინიომ ორი მეურვე ჩამოიშორა და ძლიერი დარტყმით ნიუ ვიჟენი წინ გაიყვანა, 2:1. კავკასიელებმა შეტევები გააგრძელეს და მე-13 წუთზე გარი წერეთლის პასით გიორგი ზუნტუროვმა მოჭრილი დარტყმით ეფექური გოლი გაიტანა და ანგარიში ისევ გათანაბრდა, 2:2. წუთნახევარში რონიონიოს პასით, ყირგიზმა ფორვარდმა მახმადამინოვმა კიდევ მეორე გოლი გაიტანა, 3:2. შესვენებამდე კავკასიელებს კიდევ შეეძლოთ ანგარიშის გათანაბრება, მაგრამ ნიკა ხარატიშვილისა და ლევან კობაიძის დარტყმებისას, ჯორჯიანსელთა კარი ძელმა იხსნა. კსუ-მ მეორე ტაიმში ანგარიში მაინც გაათანაბრა. 26-ე წუთზე წერეთლის დარტმული ბურთი ჯორჯიანსელთა მეკარე ბექა ტყემალაძემ მოიგერია, დამატებაზე ზუნტუროვმა შეუჩერებლად დაარტყა და ეფექტური გოლი გაიტანა, 3:3. ჯორჯიანსელებმა შეტევები გააგრძელეს და 34-ე წუთზე კიდევ ერთი გოლი იზეიმეს, რონინიომაც დუბლი მიითვალა, ამჯერად მახმადამინოვის პასით, 4:3. კსუ-ს ექვს წუთზე მეტი ჰქონდა მატჩის გადასარჩენად, მაგრამ ანგარიში აღარ შეცვლილა.