ფლეი აუტი დასრულდა და ახალი სეზონისთვის ლიგაც დაკომპლექტდა. უნივერსიტეტელმა სპარტაკმა (ჰეთ თრიკის ავტორი) სტუდენტები უმაღლესში ჩარიცხა. მომდევნო სეზონიდან, ფუტსალის უმთავრესი ლიგაში 4 სტუდენტური გუნდი იქნება - კსუ-ს, თსუ-ს და ილიაუნს, საქართველოს უნივერსიტეტი დაემატა. საქართველოს უნივერსიტეტი, რომელიც ფუტსალის ლიგა-2-ში, რეგულარული სეზონის ჩემპიონი გახდა. ფლეი ოფის ნახევარფინალში დინამო თბილისთან (რომელიც მთავარი ლიგიდან გავარდნილი ქუთაისის ნაცვლად იასპარეზებს) დამარცხდა, მაგრამ მე-3 ადგილისთვის ბრძოლაში სეუ-ს სძლია და რადგან მეორეადგილოსან თსუ-2-ს (თსუ-ს ფარმკლუბია) აღზევების უფლება არ ჰქონდა (დებულების თანახმად,  ერთ კლუბის ორი გუნდი ერთ ლიგაში ვერ იასპარეზებს), ფლეი აუტში ასპარეზობის უფლება მოიპოვა...

ფლეი აუტის პირველი მატჩში, საქართველოს უნივერსიტეტი წალენჯიხასთან ორჯერ აგებდა, მაგრამ ქამბექი მოახერხა და საბოლოოდ იმარჯვა. მეორე შეხვედრაში წალენჯიხელებმა სტუდენტების მოგება გააბათილეს და გადამწყვეტი მატჩის ჯერი დადგა. მეტოქეებმა გახსნილი თამაში არჩიეს და საკმაოდ დაძაბული ეს მატჩი, უხვგოლიანი გამოდგა. უნივერსიტეტელები სწრაფი გოლით დაწინაურდნენ - გიორგი დიაკვნიშვილმა ლამის საკუთარი საჯარიმოდან ცხრიანში ჩაუშვა ბურთი და ანგარიში გახსნა, 0:1. წალენჯიხელებმა მეტოქეს მრისხანედ უპასუხეს, მე-5 წუთზე ვაჟა კვარაცხელიამ წონასწორობა აღადგინა, 1:1. კიდევ 3 წუთში, ზუსტი საჯარიმო დარტყმით, ლაშა კაკაჩიამ მეგრელები წინ გაიყვანა, 2:1. სტუდენტები ვა-ბანკზე წავიდნენ, მეკარიანად შეუტიეს და მე-11 სპარტაკ ლომიძემ ანგარიში გაათააბრა, 2:2. ტაიმის ბოლოსწინა წუთზე წალენჯიხელებს დაწინაურების ჩინებული შანსი მიეცათ, მაგრამ ვაჟა ლუკავამ 10-მეტრიანი საჯარიმო დარტყმა კარს ააცილა. თუმცა, მეგრელებმა წინ გასვლა, მეორე ტაიმის სტარტზე მაინც შეძლეს - 21-ე წუთზე გელა მელანაშვილმა პენალტი გოლად აქცია, 3:2. სტუდენტებმა მეტოქეს ორიოდე წუთში უპასუხეს - სპარტაკ ლომიძემ მოგერიებული ბურთის დამატებაზე ყველას დაასწრო, დუბლი მიითვალა და კიდევ ერთხელ აღადგინა წონასწოერობა, 3:3. წუთში უკვე კაკაჩიამ შეასრულა დუბლი და წალენწიხა დააწინაურა, 4:3. კიდევ ორი წუთი გავიდა და საჯარიმო დარტყმით დიაკვნიშვილიც დუბლის ავტორი გახდა, 4:4. მოწინააღმდეგეებმა ბრძოლა გაგრძელეს, 33-ე წუთზე ვაჟა კვარაცხელიამაც დუბლი მიითვალა და მეგრელები კიდევ ერთხელ წინ გაიყვანა, 5:4. სტუდენტები არ გატყდნენ, ბოლო წუთებზე მჭიდრო პრესინგს მიმართეს და ამან შედეგი გამოიღო. 38-ე წუთზე მიქაელ იორამაშვილმა კიდევ ერთხელ, ამჯერად მეხუთედ გაათანაბრა ანგარიში (5:5) და თამაში დამატებით დროში გადაზარდა. პირველ ოვერტაიმში, დიაკვნიშვილის გრძელი გადაცემა, სპარტაკ ლომიძემ ეფექტურ გოლად აქცია და საქართველოს უნივერსიტეტს გამარჯვება მოუტანა, 5:6.

ფლეი ოფის ნახევარფინალის პირველ შეხვედრას არმია იგებდა, მაგრამ პსპ-მ ქამბექი მოახერხა და დამაჯერებლად მოიგო. თუმცა, ლადო ბურდულის ბიჭებმა მეორე მატჩში მეტად მოინდომეს და დაუფასდათ კიდეც.  ეს შეხვედრაც ორმხრივ იერიშებში დაძაბულად და საინტერესოდ წარიმართა. ტაიმის ნახევარი უგოლოდ გაილია. არმიელთა აქტიურობაზე ისიც მეტყველებს, რომ ფარმაცევტებმა საწყის 10 წუთში ჯარიმების ლიმიტი  ამოწურეს, პენალტს გადაურჩნენ, მაგრამ გოლებს ვერა. მე-11 წუთზე კი გიორგი სილაგავამ საკმაოდ მახვილი კუთხიდან ანგარიში გახსნა, 1:0. ოთხ წუთში ოთარ ბერეჩიკიძემ, სილაგავას მსგავსი გოლით სხვაობა გაორმაგა, 2:0. აქედან 3 წუთში, ბერეჩიკიძემ დუბლი გაიფორმა და სხვაობა სოლიდური გახადა, 3:0. ფარმაცევტები რთული ამოცანის წინაშე აღმოჩნდნენ, მაგრამ მეორე ტაიმში სამივე გოლის გაქვითვა მოახერხეს. 22-ე წუთზე ნიკოლოზ კურტანიძის გამჭოლი პასისას, ბურთი ვანო ბექაურს მოხვდა და... 3:1. არმიელების იერიშებში მეკარეც ჩაერთო და 29-ე წუთზე ეს მათ ძვირად დაუჯდათ - კურტანიძემ შორეული დარტყმით ანგარიშში სხვაობა მინიმუმამდე შეამცირა, 3:2. ორიოდე წუთში ნიკოლოზ კოპლატაძის მიერ დაწყებული შეტევისას, ლევან სვანიძემ ბოლომდე იბრძოლა და ანგარიში გაათანაბრა, 3:3. ფსიქოლოგიური უპირატესობა ფარმაცევტების მხარეს გადავიდა, მაგრამ... მატჩის ბოლო 3 წუთი განსაკუთრებით დრამატული გამოდგა, რომელშიც არმიელთა მეკარე ვახტანგ ტერუნაშვილმა როლი მოირგო. კურტანიძისა და კოპლატაძის დარტყმებისას, სწორედ ტერუნაშვილმა იმარჯვა. 37-ე წუთზე არმიელებმა პრესინგისას ბურთი მოიპოვეს და ბერეჩიკიძის პასით კახაბერ მაისაიამ არმია დააწინაურა, 4:3. პსპ-მ მეკარიანად შეუტია და არმიელთა კიპერის ჯერიც დადგა... ტერუნაშვილი კოპლატაძის დარტყმული ბურთს დაეუფლა და შორეული ზუსტი დარტყმით ცარიელი კარის ბადეში მიუჩინა ადგილი, 5:3. ფარმაცევტებს წუთი და 40 წამი ჰქონდათ მატჩის გადასარჩენად, მაგრამ მათ მხოლოდ ერთი გოლით უპასუხეს... 39-ე წუთზე ნიკოლოზ კურტანიძის გოლი საბოლოო აღმოჩნდა ამ შეხვედრაში. არმიამ 5:4 გაიმარჯვა, პსპ-ს მოგება გააბათილა და ამ წყვილში ფინალისტის ვინაობას მესამე მატჩი გადაწყვეტს, რომელიც 27 მაისს შედგება.