ფუტსალის ლიგის მოქმედ ჩემპიონ ნიუ ვიჟენ ჯორჯიანსს, ფინალში გასული წლის მსგასვად, წელსაც პსპ დაუპირისპირდება. ფლეი ოფის ფინალის სერიაში, საბოლოო გამარჯვებისთვის 3 მოგებაა საჭირო. ფინალამდე ჯერ დროა და ვნახოთ რა მოხდა ნახევარფინალებში...

შარშან, ნიუ ვიჯენ ჯორჯიანსმა ნახევარფინალში თსუ-ს ზედიზედ ორი მატჩი მოუგო და ფინალში გავიდა. ამჟამად, ნახევარფინალის პირველ თამაშში,  ჯორჯიანსელებმა კსუ-ს მინიმუმალურად 4:3 სძლიეს და ალბათ ბევრი ფიქრობდა, რომ კავკასიელები მეორე შეხვედრის მოგებას მოახერხებდნენ... თუმცა, ავთანდილ ასათიანის ბიჭებმა მეტოქეს უფრო მომზადებულები დაუხვდნენ და გარჯაც დაუფასდათ, დამაჯერებლად იმარჯვეს. სწრაფ ტემპში მიმდინარე ამ დინამიურ მატჩში, მე-4 წუთზე ნიუ ვიჟენი დაწინაურდა - ირაკლი თოდუამ ქუსლით გახსნა ანგარიში, 0:1. მე-11 წუთზე დავით ხეჩიკაშვილმა ფინტების კორიანტელი დაატრიალა, 4 მეტოქეს გასცდა, მაგრამ საჯარიმოს მისადგომებთან წააქციეს. ეს საჯარიმო დარტყმა ბაზილიელმა რონინიომ გოლად აქცია, 0:2. აქედან ოთხ წუთში, დამუშავებული კომბინაციისას, რონინიოს პასით შოთა თოფურიამ სხვაობა სამამდე გაზარდა, 0:3. კავკასიელები ვა-ბანკზე წავიდნენ, მეკარიანად შეუტიეს და მე-18 წუთზე სტუენტების მეკარე ბექა გოგსაძის მეხუთე გასროლა შედეგიანი აღმოჩნდა, 1:3. ჯორჯიანსელებმა ნახევარ წუთში აღადგინეს სტატუს-კვო - ნიკოლოზ გაბრიჩიძის ფლანგურ რეიდისას, მისი გამჭოლი პასი ვახტანგ კეკელიამ გოლად აქცია, 1:4. სტუდენტებმა მეორე ტაიმი მწვავე შეტევებით დაიწყეს. 24-ე წუთზე საჯარიმოში გარი წერეთლის წაქცევისთვის დანიშნული პენალტი საბა ტყეშელაშვილმა გამოიყენა 2:4. კავკასიელებს 16 წუთი ჰქონდათ 2-ბურთიანი ჩამორჩენის აღმოსაფხვრელად. სტუდენტებმა კვლავ მეკარიანად შეუტიეს, მაგრამ ჯორჯიანსელემა არა თუ გაუძლეს, მეტოქე კიდევ ორჯერ დაამწუხრეს. 33-ე წუთზე კეკელიამ დუბლი შეასრულა, 2:5. ბოლოსწინა წუთზე კი ვახტანგ ჯვარაშვილმა საბოლოო ანგარიში დააფიქსირა, 2:6. ნიუ ვიჟენ ჯორჯიანსი ზედიზედ მესამედ ფინალში გავიდა.

თითო მოგების შემდეგ, პსპ-სა და არმიას შორის გამარჯვებული გადამწყვეტს მატჩში უნდა გამოვლენილიყო. არმიელებმა სტარტზევე შეუტიეს, თანაც მეკარიანად და ეს ძვირად დაუჯდათ. მე-2 წუთზე ლუკა ჯოლოხავამ მეტოქის შეტევა ჩაჭრა, ნიკოლოზ კურტანიძემ კი შორეული, ზუსტი დარტყმით ბურთი კარში გადაგზავნა, პსპ დაწინაურდა, 1:0. არმიელებმა იერიშები გააგრძელეს და მე-11 წუთზე კახაბერ მაისაიამ წონასწორობა აღადგინა, 1:1. ფარმაცევტებმა, უმთავრესად საკუთარი კარის უსაფრთხოებასა და კონტრშეტევებზე გააკეთს აქცენტი, ამან გაამართლა კიდეც. მე-16 წუთზე მელტონ ახალაიამ მოწინააღმდეგის იერიში ჩაჭრა, ნიკოლოზ კოპლატაძემ კი პსპ წინ გაიყვანა, 2:1. წუთიც არ გასულა და ახალაიას პასით ნიკოლოზ კურტანიძემ დუბლი გაიფორმა და ფარმაცევტების ფორა გააორმაგა, 3:1. ამან არმიელები გაახელა და ტაიმის ბოლო წუთზე ოთარ ბერეჩიკიძემ მახვილი კუთხიდან გასროლით ანგარიშში სხვაობა მინიმუმამდე შეამცირა, 3:2. პირველის მსგავსად, მეორე ტაიმი უხვგოლიანი არ გამოდგა. არმიელები სტარტზევე შეეცადნენ ანგარიშის გათანაბრებას და ეს მოახერხეს კიდეც. 23-ე წუთზე არმიელთა მეკარე ვახტანგ ტერუნაშვილმა წონასწორობა ეფექტური გოლით აღადგინა, 3:3. თამაში ორმხრივი შეტევებით გაგრძელდა და თითქმის გადაწყვეტილი იყო, რომ მატჩში დამატებითი ტაიმები გახდებოდა საჭირო, მაგრამ... მატჩის დასრულებამდე 2 წამით ადრე, კურტანიძის პასი, ლევან სვანიძემ გოლად აქცია (4:3) და პსპ ზედიზედ მეორედ ფინალში გავიდა.