ფუტსალის თასის მოქმედი გამარჯვებული არმია, ამ ტიტულის შესანარჩუნებლად, მოქმედ ჩემპიონსა და თასის შარშანწინდელ მფლობელ ნიუ ვიჟენ ჯორჯიანსს შეეჭიდა. თასის ფინალი და თანაც ასეთი მრისხანე მეტოქეების მონაწილეობით, რაღა თქმა უნდა, დრამატული უნდა გამოსულიყო და ეს მოლოდინი სრულად გამართლდა.

ჯორჯიანსელებმა აქტიურად თამაში დაიწყეს და სწრაფი გოლით დაწინაურებაც შეეძლოთ, მაგრამ როგორც ვახტანგ ჯვარაშვილის, ისე ნიკოლოზ გაბრიჩიძის დარტყმამ შედეგი არ გამოიღო და არმიელებმა მეტოქე დასაჯეს. მე-3 წუთზე თამაზ გოგსაძის დარტყმული ბურთი ნიუ ვიჟენის მეკარე ბექა ტყემალაძემ მოიგერია. ბურთისთვის ბრძოლაში ლაშა ფოფხაძის წაქცევისთვის, ნიუ ვიჟენის კარში პენალტი დაინიშნა, რომელიც ოთარ ბერეჩიკიძემ გოლად აქცია, 0:1. ამან ჯორჯიანსელები გაახელა და ჯერ რონინიო, მერე კი დავით ხეჩიკაშვილი შეეცადა გათანაბრებას, მაგრამ არც ამას შედეგი მოჰყოლია შედეგი და ისევ არმიელებმა იმარჯვეს. მე-4 წუთზე ლაშა ფოფხაძემ მეტოქეს ბურთი მოპარა და შორეული გასროლით სხვაობა გააორმაგა, 0:2. ნიუ ვიჟენი ამას არ გაუტეხავს, პირიქით გაახელა. ავთანდილ ასათიანის ბიჭებმა უფრო ორგანიზებულად შეუტიეს და ამან შედეგიც გამოიღო. მე-8 წუთზე ნიკოლოზ გაბრიჩიძემ არმიელთა გადაცემა ჩაჭრა და ძლიერი დარტყმით ანგარიშში სხვაობა მინიმუმამდე შეამცირა, 1:2. თამაში ორმხრივი მწვავე შეტევებით გაგრძელდა. ჯორჯიანსელები წონასწორობის აღდგენას შეეცადნენ და შესვენებამდე ეს შეძლეს კიდეც. ტაიმის დასრულებამდე 3 წამით ადრე, შორეული ძლიერი დარტმით რონინიომ ანგარიში გაათანაბრა, 2:2.

მეორე ტაიმში, ჯორჯიანსელთა  პირველივე იერიში შედეგიანი გამოდგა. 21-ე წუთზე ვახტანგ ჯვარაშვილის პასით, კეკელიამ კარში დაარტყა. არმიელთა მეკარე ვახტანგ ტერუნაშვილმა ბურთი კი მოიგერია, მაგრამ დამატებაზე გაბრიჩიძემ ყველას დაასწრო და დუბლი მიითვალა, 3:2. არმიელები გაცხარდნენ და შეუტიეს. თავის მხრივ, ჯორჯიანსელებიც არ იყვნენ უქმად. ასათიანის ბიჭებს კიდევ შეეძლოთ გატანა, მაგრამ, ჯვარაშვილის გასროლისას, არმიას კარი ძელმა იხსნა. ლადო ბურდულის გუნდმა ცდა არ დააკლო და ბოლომდე იბრძოლა, მაგრამ ანგარიში აღარ შეცვლილა. ნიუ ვიჟენ ჯორჯიანსმა 3:2 მოიგო და ფუტსალის თასი დაიბრუნა.