პსპ-ს ძლევის შემდეგ, კსუ-მ მეორე რთული გამოცდაც ჩააბარა, ამჯერად არმიას სძლია და ქულათა მაქსიმუმით პირველ ადგილზე დაბრუნდა. ნიუ ვიჟენ ჯორჯიანსმა ახალი სეზონის რეკორდები შემოგვთავაზა - ერთ შეხვედრაში გატანილი 14 გოლი და 13-ბურთიანი სხვაობით გამარჯვება. ფარმაცევტებმა მარცხიანი სტარტი ამჯერადაც ვერ გამოასწორეს - ექვს მატჩში 5 წაგება და მხოლოდ ერთი მოგება. იმედია, ფარმაცევტები ფავორიტის როლში მალე დაბრუნდებიან... UG-წალენჯიხა-ს სეზონის პირველი მოგების აღნიშვნა შეეძლო, მაგრამ დინამო თბილისმა ბოლოსწინა წუთზე გატანილი გოლით ფრე გაახერხა. ასეთია ფუტსალის უმთავრესი ლიგის მე-6 ტურის რეზიუმე. ვრცელი მიმოხილვისთვის თანმიმდევრობას მივყვეთ.

ახალბედა მოთამაშეებით დაკომპლექტებულ ბეტის თბილისს, მრისხანე ჩემპიონებთან შანსი არ ჰქონია. ჯორჯიანსელებმა პირველ ტაიმში 6 გატანილი ბურთი იზეიმეს, რასაც მეტოქემ მხოლოდ პრესტიჟის გოლით უპასუხა. შესვენების შემდეგ, ნიუ ვიჟენმა კიდევ 8 გოლი გაიტანა და 14:1 გამარჯვებით მიმდინარე სეზონის რეკორდები დაამყარა - 13 ბურთიანი სხვაობით მოგება და ერთ მატჩში გატანილი 14 გოლი. ირაკლი თოდუამ, ვახტანგ კეკელიამ, ლაშა კურტანიძემ და ბრაზილიელმა ვილიან სოუზამ თითო ბურთი გაიტანეს. ვახტანგ ჯვარაშვილმა პოკერი (4 გოლი) მიითვალა, ნიკოლოზ გაბრიჩიძემ და ბრაზილიელმა იტალო ფსილიომ ჰეთ თრიკი შეასრულეს. სხვათა შორის, ბომბარდირთა დავას 10 გოლით სწორედ ფსილიო ჩაუდგა სათავეში, გოლით ნაკლები აქვს ჯვარაშვილს, რომელიც მეორე ადგილზეა. ბეტის თბილისიდან პრესტიჟის გოლის ავტორი გიორგი მანაგაძეა. ამ გამარჯვებითა და 13 ქულით ჯორჯიანსელები, არმიასთან ერთად მეორე-მესამე საფეხურს იყოფენ. საგულისხმოა ის, რომ მათ, ცხრილის ლიდერ კსუ-სთან ერთ მატჩი აქვთ გამოტოვებული. ბეტის თბილისი კი 3 ქულით მეშვიდე ადგილზე დარჩა.

წინა ტურში პსპ-ს ძლევის შემდეგ, კსუ-ს კიდევ ერთი რთული გამოცდის წინაშე აღმოჩნდა, რომელიც ჩინებულად ჩააბარა. არმიისა და კსუ-ს დაპირისპირება ტურის ცენტრალური მატჩი გახლდათ და ეს მოლოდინი სრულად გამართლდა. ტაიმის სამმა მეოთხედმა უგოლოდ ჩაიარა, თუმცა ორივე მეტოქეს ჰქონდა დაწინაურების არაერთი შანსი. მეტი სიხისტე არმიელთა თამაშში იყო და მათ ტაიმის შუაწელს ჯარიმების ლიმიტი ამოწურეს, რითაც სტუდენტები პენალტს მიუახლოვდნენ. მე-15 წუთიდან კავკასიელებმა კიდევ ერთხელ პრესინგს მიმართეს, რამაც მათი უპირატესობა თვალსაჩინო გახადა და კსუ-ს გოლის მოლოდინიც გაჩნდა, მაგრამ პირიქით მოხდა. მე-17 წუთზე ბაკურ ნანეიშვილის გრძელი პასით, შაკო ცირამუამ ანგარიში გახსნა (1:0). დრამატული 3 წუთიანი მონაკვეთიც სწორედ აქედან დაიწყო, რომელშიც ანგარიში ორჯერ შეიცვალა. სტუდენტებმა მეტოქეზე ზეწოლა გააძლიერეს და მე-19 წუთზე 10-მეტრიანის დარტყმის უფლება მოიპოვეს. კსუ-ს მეკარე ალი ასლანის დარტყმული პენალტისას, მისმა ვიზავი ვახტანგ ტერუნაშვილმა ბურთი მოიგერია, მაგრამ დამატებაზე ნოდარ ქურცაძემ იმარჯვა და წონასწორობა აღადგინა, 1:1. ნახევარ წუთში არმიელთა მორიგი შეტევა წარმატებული აღმოჩნდა - ცირამუამ დუბლი მიითვალა და არმია ისევ წინ გაიყვანა, 2:1. მეორე ტაიმში მეტოქეებმა როლები გაცვალეს - არმია უკეთ ათამაშდა, მათ პრესინგსაც მიმართეს და უპირატესობა მეტად გამოკვეთეს. ლადო ბურდულის ბიჭებს 30-ე წუთზე გოლის გატანის ჩინებული შანსი ჰქონდათ, მაგრამ სტუდენტების კიპერმა ალი ასლანმა სამმაგი სეივით კსუ იხსნა. აქედან წუთში კავკასიელებმა მეტოქე დასაჯეს, ქურცაძემ დუბლი შეასრულა და ანგარიში გაათანაბრა. დარჩენილი დრო ორმხრივ შეტევებში გაილია. თითქოსდა მატჩი ფრედ მთავრდებოდა, მაგრამ მატჩის დასრულებამდე 10 წამით ადრე, საბა ტყეშელაშვილმა შორეული ძლიერი დარტყმითა და ეფექტური გოლით კავკასიელებს გამარჯვება მოუტანა, 2:3.  შედეგად, წინა ტურის ლიდერი არმია მესამეზე დაქვეითდა, თუმცა ჯორჯიანსელთა მსგავსად არმიელებსაც 13 ქულა აქვთ. ქულათა მაქსიმუმის ავტორი კსუ, სრულიად დამსახურებულად, ცხრილის სათავეშია.

ბოლო ორი, ჯამში კი ამ სეზონის მესამე მარცხის შემდეგ, პსპ-მ თსუ-სთან მატჩიც მარცხიანად დაიწყო. მე-6 წუთზე სტუდენტები გიორგი ექსეულიძის ავტოგოლით დაწინაურდნენ. ორიოდე წუთში პსპ-ს მეკარისა და მცველის შეუთანხმებელი მოქმედების შედეგად, მელტონ ახალაიას დარტყმული ბურთი კარში აღმოჩნდა, 0:2. ამის მერე ფარმაცევტებმა თამაში დაალაგეს და შედეგიც მოიმკეს. ნიკოლოზ კურტანიძის პასით, ლაშა სიგუნავამ ანგარიშში სხვაობა მინიმუმამდე შეამცირა, 1:2. ფარმაცევტებმა შეტევები გააგრძელეს, სტუდენტებმა კი კონტრიერიშებზე გააკეთეს აქცენტი და გვარიანადაც იხეირეს. მე-16 წუთზე ალექსანდრე ორაგველიძემ ორბურთიანი სხვაობა აღადგინა, 1:3. ნახევარ წუთში ახალაიამ მეტოქეს ბურთი მოპარა, მისი პასით კი ნიკა ჩალაძემ ანგარიში გაზარდა, 1:4. პსპ-მ იერიშები გაამწვავა, მაგრამ... თსუ-მ გაიტანა - ტაიმის ბოლო წუთზე გიორგი ხაბალაევმა ანგარიშში სხვაობა სოლიდური გახადა, 1:5. ფარმაცევტები მეორე ტაიმი სწრაფი გოლით დაიწყეს. 22-ე წუთზე ლევან სარდანაშვილმა სხვაობა სამამდე შეამცირა, 2:5. ამის მერე 14 წუთი არაფერი შეცვლილა. მერე კი მეტოქეებმა გოლებით დახუნძლული 4-წუთიანი ეპიზოდი შემოგვთავაზეს. 36-ე წუთზე სიგუნავამ მეორედაც გაიტანა და პსპ-ს ქამბექის შესაძლებლობა მიეცა, 3:5. თუმცა, ოციოდე წამში ახალაიამ სამბურთიანი ფორა აღადგინა, 3:6. ფარმაცევტებმა ბრძოლა გააგრძელეს და 39-ე წუთზე ნიკოლოზ კოპლატაძემაც გაიტანა, 4:6. ბოლო წუთზე ჩალაძემაც დუბლი შეასრულა და საბოლოო ანგარიში დააფიქსირა, 4:7. ამ მოგებით, 10 ქულიანი თსუ მე-4 ადგილზე გამაგრდა, პსპ კი 3 ქულით მე-6 საფეხურზე დარჩა.

UG-წალენჯიხასთან შეხვედრაში დინამო თბილისმა სტარტზევე მეკარიანად შეუტია და დაწინაურდა კიდეც. კახაბერ მაისაიამ მე-2 წუთზე გახსნა ანგარიში, 0:1. თუმცა, წალენჯიხელებმა მეტოქეზე ზეწოლა გააძლიერეს და არა მარტო ანგარიში გაათანაბრეს, დაწინაურდნენ კიდეც. ზუსტად 2 წუთში, ლუკა ელიზბარაშვილის პასით, სპარტაკ ლომიძემ წონასწორობა აღადგინა, 1:1. დინამოელებმა ისევ მეკარიანად გააგრძელეს შეტევები, UG-წალენჯიხამ დაცვიდან თამაში არჩია და მე-16 წუთზე ელიზბარაშვილმა ცარიელ კარში შორეული დარტყმით თავისი გუნდი წინ გაიყვანა, 2:1. მეორე ტაიმი ორმხრივ შეტევებში გაილია, ორივე გუნდს შეეძლო ანგარიშის შეცვლა, მაგრამ დინამოელებმა იმარჯვეს და მატჩის მიწურულს ანგარიშის გათანაბრება მოახერხეს. მატჩის ბოლოსწინა წუთზე ლაშა-გიორგი ობოლაძემ საბოლოო ანგარიში დააფიქსირა, 2:2. ამ ფრითა და 7 ქულით დინამო თბილისი მე-5 ადგილზე დარჩა, წალენჯიხელები კი 2 ქულით ბოლო სახურზე არიან.